gham nairang dikhata hai hasti ki jalwa-numai ka

ġham nairañg dikhātā hai hastī kī jalva-numā.ī kā

kitne zamānoñ kā hāsil hai ik lamha tanhā.ī kā

tere nāzuk lab haiñ goyā mausam kā mauzū-e-suḳhan

gulshan gulshan shohra hai shādābī kā ra.anā.ī kā

apne ġham kī fikr na kī is duniyā kī ġham-ḳhvārī meñ

barsoñ ham ne dast-e-junūñ se kaam liyā dānā.ī kā

aalam ke har manzar ko kuchh rañg na.e mil jaate haiñ

kirneñ sub.h kī le jaatī haiñ ruup tirī añgḌā.ī kā

sāhil o tūfāñ ke afsāne rañg-e-haqīqat kyā deñge

Duub ke ubhro to irfāñ ho dariyā kī gahrā.ī kā

dil meñ 'kausar' aa.e kitne daur taġhayyur ke lekin

naqsh-e-tamannā par jab dekho aalam hai barnā.ī kā

gham nairang dikhata hai hasti ki jalwa-numai ka

kitne zamanon ka hasil hai ek lamha tanhai ka

tere nazuk lab hain goya mausam ka mauzu-e-suKHan

gulshan gulshan shohra hai shadabi ka ranai ka

apne gham ki fikr na ki is duniya ki gham-KHwari mein

barson hum ne dast-e-junun se kaam liya danai ka

aalam ke har manzar ko kuchh rang nae mil jate hain

kirnen subh ki le jati hain rup teri angDai ka

sahil o tufan ke afsane rang-e-haqiqat kya denge

Dub ke ubhro to irfan ho dariya ki gahrai ka

dil mein 'kausar' aae kitne daur taghayyur ke lekin

naqsh-e-tamanna par jab dekho aalam hai barnai ka