gham sahte sahte muddat tak aisi bhi haalat hoti hai

ġham sahte sahte muddat tak aisī bhī hālat hotī hai

āñkhoñ meñ ashk umaDte haiñ rone se nafrat hotī hai

jab raat kā sannāTā hotā hai dil meñ ḳhalvat hotī hai

tum chāñdnī jaise chhiTkā do aisī kaifiyyat hotī hai

aalam par jaise chhā.e hoñ mahbūb kī god meñ aa.e hoñ

ab dil kī mohabbat meñ aksar aisī mahviyyat hotī hai

jab hasrat-o-armāñ miT jaa.eñ kuchh aas na ho kuchh yaas na ho

jab maut kī niiñd aa.e dil ko bedār mohabbat hotī hai

jab rañj zamāna detā hai ham maut ko dāvat dete haiñ

phir tum kyuuñ yaad aa jaate ho jiine ko tabī.at hotī hai

merāj-e-junūñ ke raste meñ aisā bhī maqām ik aatā hai

ham hosh meñ hote haiñ lekin apne se bhī vahshat hotī hai

be-dād kī bhī us zālim ko vo pyārī adā.eñ aatī haiñ

mar mar ke jiye jaane ko 'jigar' afsos tabī.at hotī hai

gham sahte sahte muddat tak aisi bhi haalat hoti hai

aankhon mein ashk umaDte hain rone se nafrat hoti hai

jab raat ka sannaTa hota hai dil mein KHalwat hoti hai

tum chandni jaise chhiTka do aisi kaifiyyat hoti hai

aalam par jaise chhae hon mahbub ki god mein aae hon

ab dil ki mohabbat mein aksar aisi mahwiyyat hoti hai

jab hasrat-o-arman miT jaen kuchh aas na ho kuchh yas na ho

jab maut ki nind aae dil ko bedar mohabbat hoti hai

jab ranj zamana deta hai hum maut ko dawat dete hain

phir tum kyun yaad aa jate ho jine ko tabiat hoti hai

meraj-e-junun ke raste mein aisa bhi maqam ek aata hai

hum hosh mein hote hain lekin apne se bhi wahshat hoti hai

be-dad ki bhi us zalim ko wo pyari adaen aati hain

mar mar ke jiye jaane ko 'jigar' afsos tabiat hoti hai