gham usko sari raat sunaya to kya hua

ġham us ko saarī raat sunāyā to kyā huā

yā roz uTh ke sar ko phirāyā to kyā huā

un ne to mujh ko jhūTe bhī pūchhā na ek baar

maiñ ne use hazār jatāyā to kyā huā

ḳhvāhāñ nahīñ vo kyuuñ hī maiñ apnī taraf se yuuñ

dil de ke us ke haath bikāyā to kyā huā

ab sa.ī kar sip.har ki mere muue ga.e

us kā mizāj mehr pe aayā to kyā huā

mat rañja kar kisī ko ki apne to e'tiqād

dil Dhaa.e kar jo ka.aba banāyā to kyā huā

maiñ said-e-nā-tavāñ bhī tujhe kyā karūñgā yaad

zālim ik aur tiir lagāyā to kyā huā

kyā kyā duā.eñ māñgī haiñ ḳhalvat meñ shaiḳh yuuñ

zāhir jahāñ se haath uThāyā to kyā huā

vo fikr kar ki chāk-e-jigar paave iltiyām

nāseh jo tū ne jaama sulāyā to kyā huā

jiite to 'mīr' un ne mujhe daaġh hī rakkhā

phir gor par charāġh jalāyā to kyā huā

gham us ko sari raat sunaya to kya hua

ya roz uTh ke sar ko phiraya to kya hua

un ne to mujh ko jhuTe bhi puchha na ek bar

main ne use hazar jataya to kya hua

KHwahan nahin wo kyun hi main apni taraf se yun

dil de ke us ke hath bikaya to kya hua

ab sai kar siphar ki mere mue gae

us ka mizaj mehr pe aaya to kya hua

mat ranja kar kisi ko ki apne to e'tiqad

dil Dhae kar jo kaba banaya to kya hua

main said-e-na-tawan bhi tujhe kya karunga yaad

zalim ek aur tir lagaya to kya hua

kya kya duaen mangi hain KHalwat mein shaiKH yun

zahir jahan se hath uThaya to kya hua

wo fikr kar ki chaak-e-jigar pawe iltiyam

naseh jo tu ne jama sulaya to kya hua

jite to 'mir' un ne mujhe dagh hi rakkha

phir gor par charagh jalaya to kya hua