gham ye nahin ki gham se mulaqat hui

ġham ye nahīñ ki ġham se mulāqāt huī

ġham hai ki rāh-e-ġham meñ ḳhurāfāt ho ga.ī

maiñ ehtimām-e-majlis-e-ādāb meñ rahā

kyuuñ log uTh ga.e haiñ ye kyā baat ho ga.ī

māhaul jab tamāzat-e-ḳhurshīd meñ huā

rut jaane kyuuñ badal ga.ī barsāt ho ga.ī

vo vāqi.a jo ruuh kī gahrā.iyoñ meñ thā

vo baat ab to nazr-e-hikāyāt ho ga.ī

tanhā thī merī sāda-ravī sū-e-zindagī

phir saath mere gardish-e-hālāt ho ga.ī

maiñ fart-e-ehtiyāt se guzrā magar 'atīq'

us par nigāh az-rah-e-ādāt ho ga.ī

gham ye nahin ki gham se mulaqat hui

gham hai ki rah-e-gham mein KHurafat ho gai

main ehtimam-e-majlis-e-adab mein raha

kyun log uTh gae hain ye kya baat ho gai

mahaul jab tamazat-e-KHurshid mein hua

rut jaane kyun badal gai barsat ho gai

wo waqia jo ruh ki gahraiyon mein tha

wo baat ab to nazr-e-hikayat ho gai

tanha thi meri sada-rawi su-e-zindagi

phir sath mere gardish-e-haalat ho gai

main fart-e-ehtiyat se guzra magar 'atiq'

us par nigah az-rah-e-adat ho gai