gham-zada kitna hamare zehn ka saya raha

ġham-zada kitnā hamāre zehn kā saaya rahā

sang-zār-e-fikr-o-fan se ḳhud ko Takrātā rahā

maiñ tafakkur ke añdhere ġhaar meñ baiThā rahā

paas mere vāhimoñ ke sher kā Derā rahā

hirs ke ḳhurshīd kī aisī pazīrā.ī huī

azmatoñ ke āsmāñ kā rang phīkā sā rahā

lafz kī bārish meñ saarī raushnā.ī dhul ga.ī

vaqt kā qirtās pahle kī tarah saada rahā

haT ke mehvar se ḳhalā meñ kitne taare gum hue

gardishoñ meñ āgahī kā ek sayyāra rahā

zindagī kī zahr-nākī ḳhatm ho jaatī magar

ḳhvāhishoñ ke naag se maiñ ḳhud ko Dasvātā rahā

ham ne 'jāmī' ghar ke andar āfiyat mahsūs kī

ḳhauf kā saaya pas-e-dīvār lahrātā rahā

gham-zada kitna hamare zehn ka saya raha

sang-zar-e-fikr-o-fan se KHud ko Takraata raha

main tafakkur ke andhere ghaar mein baiTha raha

pas mere wahimon ke sher ka Dera raha

hirs ke KHurshid ki aisi pazirai hui

azmaton ke aasman ka rang phika sa raha

lafz ki barish mein sari raushnai dhul gai

waqt ka qirtas pahle ki tarah sada raha

haT ke mehwar se KHala mein kitne tare gum hue

gardishon mein aagahi ka ek sayyara raha

zindagi ki zahr-naki KHatm ho jati magar

KHwahishon ke nag se main KHud ko Daswata raha

hum ne 'jami' ghar ke andar aafiyat mahsus ki

KHauf ka saya pas-e-diwar lahraata raha