ghamon ki dhup mein milte hain saeban ban kar

ġhamoñ kī dhuup meñ milte haiñ sā.ebāñ ban kar

zamīñ pe rahte haiñ kuchh log āsmāñ ban kar

uḌe haiñ jo tire qadmoñ se ḳhaak ke zarre

chamak rahe haiñ falak par vo kahkashāñ ban kar

jinheñ nasīb huī hai tire badan kī nasīm

mahak rahe haiñ zamīñ par vo gulsitāñ ban kar

meñ iztirāb ke aalam meñ raqs kartā rahā

kabhī ġhubār kī sūrat kabhī dhuāñ ban kar

mirī sadāoñ ko ab to panāh mil jaa.e

tujhe pukār rahā huuñ tirī zabāñ ban kar

maiñ is zamīn kī vus.at pe sair kartā huuñ

falak ke chāñd sitāroñ kā rāz-dāñ ban kar

masarratoñ kī fazā meñ sadā vo rahte haiñ

jo ġham ke māroñ se milte haiñ mehrbāñ ban kar

unhīñ ko shān-e-chaman ye zamāna kahtā hai

chaman ko luuT rahe haiñ jo bāġhbāñ ban kar

maiñ harf harf jise paḌh chukā huuñ ai 'afzal'

varaq varaq pe vo bikhrā hai dāstāñ ban kar

ghamon ki dhup mein milte hain saeban ban kar

zamin pe rahte hain kuchh log aasman ban kar

uDe hain jo tere qadmon se KHak ke zarre

chamak rahe hain falak par wo kahkashan ban kar

jinhen nasib hui hai tere badan ki nasim

mahak rahe hain zamin par wo gulsitan ban kar

mein iztirab ke aalam mein raqs karta raha

kabhi ghubar ki surat kabhi dhuan ban kar

meri sadaon ko ab to panah mil jae

tujhe pukar raha hun teri zaban ban kar

main is zamin ki wusat pe sair karta hun

falak ke chand sitaron ka raaz-dan ban kar

masarraton ki faza mein sada wo rahte hain

jo gham ke maron se milte hain mehrban ban kar

unhin ko shan-e-chaman ye zamana kahta hai

chaman ko luT rahe hain jo baghban ban kar

main harf harf jise paDh chuka hun ai 'afzal'

waraq waraq pe wo bikhra hai dastan ban kar