ghamon mein kuchh kami ya kuchh izafa kar rahe hain

ġhamoñ meñ kuchh kamī yā kuchh izāfa kar rahe haiñ

samajh meñ kuchh nahīñ aatā ki ham kyā kar rahe haiñ

jo aatā hai nazar meñ us ko le aate haiñ dil meñ

na.ī tarkīb se ham ḳhud ko tanhā kar rahe haiñ

nazar karte haiñ yuuñ jaise bichhaḌne kī ghaḌī ho

suḳhan karte haiñ aise jaise girya kar rahe haiñ

tumhāre hī ta.alluq se to ham haiñ is badan meñ

tumhāre hī liye to ye tamāshā kar rahe haiñ

zavāl-e-āmādgī ab gūñjtī hai dhaḌkanoñ meñ

so dil se ḳhvāhishoñ kā bojh halkā kar rahe haiñ

suḳhan tum se ho yā ahbāb se yā apne dil se

yahī lagtā hai ham har baat bejā kar rahe haiñ

tumhārī aarzū hone se pahle bhī to ham the

so jaise ban paḌe ab bhī guzārā kar rahe haiñ

zarā pūchhe koī ma.adūm hote in dukhoñ se

hameñ kis ke bharose par akelā kar rahe haiñ

hameñ roke hue hai pās-e-nāmūs-e-mohabbat

ye mat samjho ki ham duniyā kī parvā kar rahe haiñ

ba-juz-sīna-ḳharāshī kuchh nahīñ aatā hai lekin

zarā dekho to ham ye kaam kaisā kar rahe haiñ

hameñ is kaam kī mushkil kā andāza hai sāhab

baḌe arse se ham bhī tark-e-duniyā kar rahe haiñ

jo hogī sub.h to taqsīm ho jā.eñge phir ham

Dhalī hai shaam to ḳhud ko ikaTThā kar rahe haiñ

junūñ se itnā derīna ta.alluq toḌ deñge?

are tauba kareñ 'irfān', ye kyā kar rahe haiñ

ghamon mein kuchh kami ya kuchh izafa kar rahe hain

samajh mein kuchh nahin aata ki hum kya kar rahe hain

jo aata hai nazar mein us ko le aate hain dil mein

nai tarkib se hum KHud ko tanha kar rahe hain

nazar karte hain yun jaise bichhaDne ki ghaDi ho

suKHan karte hain aise jaise girya kar rahe hain

tumhaare hi talluq se to hum hain is badan mein

tumhaare hi liye to ye tamasha kar rahe hain

zawal-e-amadgi ab gunjti hai dhaDkanon mein

so dil se KHwahishon ka bojh halka kar rahe hain

suKHan tum se ho ya ahbab se ya apne dil se

yahi lagta hai hum har baat beja kar rahe hain

tumhaari aarzu hone se pahle bhi to hum the

so jaise ban paDe ab bhi guzara kar rahe hain

zara puchhe koi madum hote in dukhon se

hamein kis ke bharose par akela kar rahe hain

hamein roke hue hai pas-e-namus-e-mohabbat

ye mat samjho ki hum duniya ki parwa kar rahe hain

ba-juz-sina-KHarashi kuchh nahin aata hai lekin

zara dekho to hum ye kaam kaisa kar rahe hain

hamein is kaam ki mushkil ka andaza hai sahab

baDe arse se hum bhi tark-e-duniya kar rahe hain

jo hogi subh to taqsim ho jaenge phir hum

Dhali hai sham to KHud ko ikaTTha kar rahe hain

junun se itna derina talluq toD denge?

are tauba karen 'irfan', ye kya kar rahe hain