ghamza-e-mashuq mushtaqon ko dikhlati hai tegh

ġhamza-e-ma.shūq mushtāqoñ ko dikhlātī hai teġh

sūrat-e-abrū hamāre sar chaḌhī jaatī hai teġh

hote haiñ qurbāñ shahādat meñ gale mil kar shahīd

dosh-e-qātil par hilāl-e-īd ban jaatī hai teġh

past ḳham khaa.e hue lab ḳhushk dam Duubā huā

chalte chalte ab to o zālim thakī jaatī hai teġh

be-gunāhī kā burā ho zaḳhm-e-be-lazzat hue

dast-e-qātil meñ ba-rañg-e-bed tharrātī hai teġh

is kī gardan par mirā ḳhuuñ us kā ehsāñ mere sar

us se jhuk jaatā huuñ maiñ aur mujh se jhuk jaatī hai teġh

paar dariyā-e-shahādat se utar jaate haiñ sar

kashtī-e-ushshāq kī mallāh ban jaatī hai teġh

ḳhuun garmātā hai jab paanī meñ lahrātā huā

misl-e-māhī ḳhauf ke maare uchhal jaatī hai teġh

abrū-e-ḳhūñ-ḳhār qātil kā koī pursāñ nahīñ

ab nikaltī hai kahīñ to quraq ho jaatī hai teġh

kab bujhe is tarah hai shauq-e-shahādat kī ye pyaas

zaḳhm ke muñh meñ zabāñ ban kar nikal aatī hai teġh

marhabā jazb-e-shahādat us kā maġhrib hai gulū

aap manzil par hilāl-āsā pahuñch jaatī hai teġh

tishna-kāmo ghaaT se utre to beḌā paar hai

chashma-e-kausar chhalaktā hai ki lahrātī hai teġh

laḌtī hai chhīñTe lab-e-jū rañg kaisā laal hai

maar kar paanī meñ ġhota ḳhuuñ meñ nahlātī hai teġh

zaḳhm-e-kārī ne kahīñ muñh khol kar kuchh kah diyā

kyā huā qabze se bāhar kyuuñ huī jaatī hai teġh

jaan se ushshāq jaate haiñ guzar kaTte haiñ ġhair

pul-sirāt-e-imtihān-e-ishq kahlātī hai teġh

āftāb-e-dāġh-e-saudā kī harārat dekh kar

chhāñv meñ dil tuftgān-e-ġham ko biThlātī hai teġh

mudda.ī dar-parda kaT kaT jaate haiñ shakl-e-niyām

ai 'bayāñ' merī zabān-e-tez kahlātī hai teġh

ghamza-e-mashuq mushtaqon ko dikhlati hai tegh

surat-e-abru hamare sar chaDhi jati hai tegh

hote hain qurban shahadat mein gale mil kar shahid

dosh-e-qatil par hilal-e-id ban jati hai tegh

past KHam khae hue lab KHushk dam Duba hua

chalte chalte ab to o zalim thaki jati hai tegh

be-gunahi ka bura ho zaKHm-e-be-lazzat hue

dast-e-qatil mein ba-rang-e-bed tharraati hai tegh

is ki gardan par mera KHun us ka ehsan mere sar

us se jhuk jata hun main aur mujh se jhuk jati hai tegh

par dariya-e-shahadat se utar jate hain sar

kashti-e-ushshaq ki mallah ban jati hai tegh

KHun garmata hai jab pani mein lahraata hua

misl-e-mahi KHauf ke mare uchhal jati hai tegh

abru-e-KHun-KHar qatil ka koi pursan nahin

ab nikalti hai kahin to quraq ho jati hai tegh

kab bujhe is tarah hai shauq-e-shahadat ki ye pyas

zaKHm ke munh mein zaban ban kar nikal aati hai tegh

marhaba jazb-e-shahadat us ka maghrib hai gulu

aap manzil par hilal-asa pahunch jati hai tegh

tishna-kaamo ghaT se utre to beDa par hai

chashma-e-kausar chhalakta hai ki lahraati hai tegh

laDti hai chhinTe lab-e-ju rang kaisa lal hai

mar kar pani mein ghota KHun mein nahlati hai tegh

zaKHm-e-kari ne kahin munh khol kar kuchh kah diya

kya hua qabze se bahar kyun hui jati hai tegh

jaan se ushshaq jate hain guzar kaTte hain ghair

pul-siraat-e-imtihan-e-ishq kahlati hai tegh

aaftab-e-dagh-e-sauda ki hararat dekh kar

chhanw mein dil tuftgan-e-gham ko biThlati hai tegh

muddai dar-parda kaT kaT jate hain shakl-e-niyam

ai 'bayan' meri zaban-e-tez kahlati hai tegh