gar aish se ishrat mein kaTi raat to phir kya

gar aish se ishrat meñ kaTī raat to phir kyā

aur ġham meñ basar ho ga.ī auqāt to phir kyā

jab aa.ī ajal phir koī DhūñDā bhī na paayā

qissoñ meñ rahe harf-o-hikāyāt to phir kyā

had bos-o-kanār aur jo thā us ke sivā aah

gar vo bhī mayassar huā haihāt to phir kyā

do din agar in āñkhoñ ne duniyā meñ mirī jaañ

kī nāz-o-adāoñ kī ishārāt to phir kyā

phir uḌ ga.ī ik aan meñ sab hashmat o sab shaan

le sharq se tā ġharb lagā haat to phir kyā

asp o shutur o fiil o ḳhar o naubat o lashkar

gar qabr talak apne chalā saat to phir kyā

jab aa.ī ajal phir vahīñ uTh bhāge shitābī

rindoñ meñ hue ahl-e-ḳharābāt to phir kyā

do din ko jo ta.avīz o fatīla o amal se

tasḳhīr kiyā ālam-e-jinnāt to phir kyā

is umr-e-do-roza meñ agar ho ke nujūmī

sab chhān liye arz o samāvāt to phir kyā

ik dam meñ havā ho ga.e sab amalī o nazarī

the yaad jo asbāb o alāmāt to phir kyā

us ne koī din baiTh ke ārām se khāyā

vo māñgtā dar dar phirā ḳhairāt to phir kyā

daulat hī kā milnā hai baḌī chiiz 'nazīr' aah

bil-farz huī us se mulāqāt to phir kyā

āḳhir ko jo dekhā to hue ḳhaak kī Dherī

do din kī huī kashf-o-karāmāt to phir kyā

jab aa.ī ajal ek riyāzat na ga.ī pesh

mar mar ke jo kī koshish o tā.āt to phir kyā

jab aa.ī ajal aah to ik dam meñ ga.e mar

gar ye bhī huī ham meñ karāmāt to phir kyā

gar aish se ishrat mein kaTi raat to phir kya

aur gham mein basar ho gai auqat to phir kya

jab aai ajal phir koi DhunDa bhi na paya

qisson mein rahe harf-o-hikayat to phir kya

had bos-o-kanar aur jo tha us ke siwa aah

gar wo bhi mayassar hua haihat to phir kya

do din agar in aankhon ne duniya mein meri jaan

ki naz-o-adaon ki ishaaraat to phir kya

phir uD gai ek aan mein sab hashmat o sab shan

le sharq se ta gharb laga hat to phir kya

asp o shutur o fil o KHar o naubat o lashkar

gar qabr talak apne chala sat to phir kya

jab aai ajal phir wahin uTh bhage shitabi

rindon mein hue ahl-e-KHarabaat to phir kya

do din ko jo tawiz o fatila o amal se

tasKHir kiya aalam-e-jinnat to phir kya

is umr-e-do-roza mein agar ho ke nujumi

sab chhan liye arz o samawat to phir kya

ek dam mein hawa ho gae sab amali o nazari

the yaad jo asbab o alamat to phir kya

us ne koi din baiTh ke aaram se khaya

wo mangta dar dar phira KHairaat to phir kya

daulat hi ka milna hai baDi chiz 'nazir' aah

bil-farz hui us se mulaqat to phir kya

aaKHir ko jo dekha to hue KHak ki Dheri

do din ki hui kashf-o-karamat to phir kya

jab aai ajal ek riyazat na gai pesh

mar mar ke jo ki koshish o taat to phir kya

jab aai ajal aah to ek dam mein gae mar

gar ye bhi hui hum mein karamat to phir kya