گر بے نقاب عارض تاباں کرے کوئی

گر بے نقاب عارض تاباں کرے کوئی

ایماں کو کفر کفر کو ایماں کرے کوئی

بجلی کی یہ چمک یہ پپیہوں کی پی کہاں

اف کس طرح بسر شب ہجراں کرے کوئی

قطرے کو موت آئی جو دریا سے مل گیا

اب کیا کسی کے عشق کا ارماں کرے کوئی

ہم خاک میں ملے تو ملے لیکن اے وفاؔ

کیا فائدہ کہ ان کو پشیماں کرے کوئی

اشکوں نے گھر کو غیرت صحرا بنا دیا

اب کیوں جنوں میں عزم بیاباں کرے کوئی

اٹھتے ہوئے شباب کی انگڑائی الاماں

کیوں اب نہ چاک چاک گریباں کرے کوئی

پہلو میں جلوہ گر ہے وہ کافر ادا ولیؔ

کس طرح ضبط شورش پنہاں کرے کوئی