gar ek shab bhi wasl ki lazzat na pae dil

gar ek shab bhī vasl kī lazzat na paa.e dil

phir kis umiid par koī tum se lagā.e dil

ik dil tujhe mudām satāne ko chāhiye

tere liye kahāñ se koī roz laa.e dil

utrā na aa ke yaañ koī juz kārvān-e-ġham

mehmāñ-sarā se kam nahīñ yaaro sarā-e-dil

kūche se apne ham ko uThātā hai kis liye

baiTheñ haiñ ham jahān se apnā uThā.e dil

kahte haiñ dardmand 'taraqqī' kā haal dekh

yā rab kabhī kisī pe kisī kā na aa.e dil

gar ek shab bhi wasl ki lazzat na pae dil

phir kis umid par koi tum se lagae dil

ek dil tujhe mudam satane ko chahiye

tere liye kahan se koi roz lae dil

utra na aa ke yan koi juz karwan-e-gham

mehman-sara se kam nahin yaro sara-e-dil

kuche se apne hum ko uThata hai kis liye

baiThen hain hum jahan se apna uThae dil

kahte hain dardmand 'taraqqi' ka haal dekh

ya rab kabhi kisi pe kisi ka na aae dil