gar ghair ke ghar se na dil-aram nikalta

gar ġhair ke ghar se na dil-ārām nikaltā

dam kaahe ko yuuñ ai dil-e-nākām nikaltā

maiñ vahm se martā huuñ vahāñ ro.ab se us ke

qāsid kī zabāñ se nahīñ paiġhām nikaltā

karte jo mujhe yaad shab-e-vasl adū tum

kyā sub.h ki ḳhurshīd na tā-shām nikaltā

jab jānte tāsīr ki dushman bhī vahāñ se

apnī tarah ai gardish-e-ayyām nikaltā

har ek se us bazm meñ shab pūchhte the naam

thā lutf jo koī mirā hamnām nikaltā

kyuuñ kaam talab hai mire āzār se gardūñ

nākām se dekhā hai kahīñ kaam nikaltā

thī nauha-zanī dil ke janāze pe zarūrī

shāyad ki vo ghabrā ke sar-e-bām nikaltā

kāñTā sā khaTaktā hai kaleje meñ ġham-e-hijr

ye ḳhaar nahīñ dil se gul-andām nikaltā

hūreñ nahīñ 'momin' ke nasīboñ meñ jo hotīñ

but-ḳhāne hī se kyuuñ ye bad-anjām nikaltā

gar ghair ke ghar se na dil-aram nikalta

dam kahe ko yun ai dil-e-nakaam nikalta

main wahm se marta hun wahan roab se us ke

qasid ki zaban se nahin paigham nikalta

karte jo mujhe yaad shab-e-wasl adu tum

kya subh ki KHurshid na ta-sham nikalta

jab jaante tasir ki dushman bhi wahan se

apni tarah ai gardish-e-ayyam nikalta

har ek se us bazm mein shab puchhte the nam

tha lutf jo koi mera hamnam nikalta

kyun kaam talab hai mere aazar se gardun

nakaam se dekha hai kahin kaam nikalta

thi nauha-zani dil ke janaze pe zaruri

shayad ki wo ghabra ke sar-e-baam nikalta

kanTa sa khaTakta hai kaleje mein gham-e-hijr

ye KHar nahin dil se gul-andam nikalta

huren nahin 'momin' ke nasibon mein jo hotin

but-KHane hi se kyun ye bad-anjam nikalta