gar humne dil sanam ko diya phir kisi ko kya

gar ham ne dil sanam ko diyā phir kisī ko kyā

islām chhoḌ kufr liyā phir kisī ko kyā

kyā jaane kis ke ġham meñ haiñ āñkheñ hamārī laal

ai ham ne go nasha bhī piyā phir kisī ko kyā

aaphī kiyā hai apne girebāñ ko ham ne chaak

aaphī siyā siyā na siyā phir kisī ko kyā

us bevafā ne ham ko agar apne ishq meñ

rusvā kiyā ḳharāb kiyā phir kisī ko kyā

duniyā meñ aa ke ham se burā yā bhalā 'nazīr'

jo kuchh ki ho sakā so kiyā phir kisī ko kyā

gar hum ne dil sanam ko diya phir kisi ko kya

islam chhoD kufr liya phir kisi ko kya

kya jaane kis ke gham mein hain aankhen hamari lal

ai hum ne go nasha bhi piya phir kisi ko kya

aaphi kiya hai apne gireban ko hum ne chaak

aaphi siya siya na siya phir kisi ko kya

us bewafa ne hum ko agar apne ishq mein

ruswa kiya KHarab kiya phir kisi ko kya

duniya mein aa ke hum se bura ya bhala 'nazir'

jo kuchh ki ho saka so kiya phir kisi ko kya