gar kahun matlab tumhaara khul gaya

gar kahūñ matlab tumhārā khul gayā

kahte haiñ achchhā huā kyā khul gayā

ġhair kī qismat kī khānī hai qasam

band thā darvāza un kā khul gayā

tum khule-bandoñ milo aġhyār se

shukr paañv ab tumhārā khul gayā

aa ga.ī be-parda vo sūrat nazar

aañkh kī jab band pardā khul gayā

ġhair se ab band ho kis baat par

gāliyoñ par muñh tumhārā khul gayā

khul gayā haal is dil-e-betāb kā

muñh dupaTTe se jo un kā khul gayā

hoñ ishāre ġhair se aur dekhūñ maiñ

bait-e-abrū kā bhī ma.anā khul gayā

nāma-bar! tere chhupāne se mujhe

apnī qismat kā navishta khul gayā

dil kī be-tābī ne rusvā kar diyā

haa.e sab par raaz apnā khul gayā

nāma-bar! gar ġhair ne dekhā nahīñ

kaise phir ḳhat kā lifāfā khul gayā

qudrat-e-haq se baḌhī ishrat kī shab

shab jo us kāfir kā juuḌā khul gayā

dekhiye kyā dil se dil ko raah hai

raaz jo tum ne chhupāyā khul gayā

jo na kahnā thā kahā sab kuchh 'nizām'

raaz bātoñ meñ vo aisā khul gayā

gar kahun matlab tumhaara khul gaya

kahte hain achchha hua kya khul gaya

ghair ki qismat ki khani hai qasam

band tha darwaza un ka khul gaya

tum khule-bandon milo aghyar se

shukr panw ab tumhaara khul gaya

aa gai be-parda wo surat nazar

aankh ki jab band parda khul gaya

ghair se ab band ho kis baat par

galiyon par munh tumhaara khul gaya

khul gaya haal is dil-e-betab ka

munh dupaTTe se jo un ka khul gaya

hon ishaare ghair se aur dekhun main

bait-e-abru ka bhi mana khul gaya

nama-bar! tere chhupane se mujhe

apni qismat ka nawishta khul gaya

dil ki be-tabi ne ruswa kar diya

hae sab par raaz apna khul gaya

nama-bar! gar ghair ne dekha nahin

kaise phir KHat ka lifafa khul gaya

qudrat-e-haq se baDhi ishrat ki shab

shab jo us kafir ka juDa khul gaya

dekhiye kya dil se dil ko rah hai

raaz jo tum ne chhupaya khul gaya

jo na kahna tha kaha sab kuchh 'nizam'

raaz baaton mein wo aisa khul gaya