gard-baad afsos ka jangal se hai paida hanuz

gard-bād afsos kā jañgal se hai paidā hanūz

haat miltā mātam-e-majnūñ se hai sahrā hanūz

joñ sadaf hai garche āñkhoñ meñ sajan bastā hanūz

kholtā niiñ uqda-e-dil vo dur-e-yaktā hanūz

jab patā pūchhūñ maiñ ghar kā yaar harjā.ī setī

do dilā karne kuuñ kahtā hai mujhe jā jā hanūz

tauq-o-pech-e-zulf-e-laila hai baghole se ayaañ

ḳhāk-e-majnūñ se niyāz-o-nāz hai rusvā hanūz

garche misl-e-shabnam-e-gul dil diyā huuñ pī ke haat

vo rañgīlā kholtā niiñ uqda-e-sīmā hanūz

jān-e-shīrīñ se sharar tan meñ jalātā hai mudām

tā.in-e-kam-zarfī-e-farhād hai ḳhārā hanūz

dāġh-e-dil 'uzlat' ko juuñ laala hai bulbul bin bahār

un guloñ se jī kisī rañgoñ nahīñ lagtā hanūz

gard-baad afsos ka jangal se hai paida hanuz

hat milta matam-e-majnun se hai sahra hanuz

jon sadaf hai garche aankhon mein sajan basta hanuz

kholta nin uqda-e-dil wo dur-e-yakta hanuz

jab pata puchhun main ghar ka yar harjai seti

do dila karne kun kahta hai mujhe ja ja hanuz

tauq-o-pech-e-zulf-e-laila hai baghole se ayan

KHak-e-majnun se niyaz-o-naz hai ruswa hanuz

garche misl-e-shabnam-e-gul dil diya hun pi ke hat

wo rangila kholta nin uqda-e-sima hanuz

jaan-e-shirin se sharar tan mein jalata hai mudam

tain-e-kam-zarfi-e-farhad hai KHara hanuz

dagh-e-dil 'uzlat' ko jun lala hai bulbul bin bahaar

un gulon se ji kisi rangon nahin lagta hanuz