gard-e-firaq ghaza kash-e-aina na ho

gard-e-firāq ġhāza kash-e-ā.ina na ho

chāho jo tum to apne tasarruf meñ kyā na ho

sajde ke har nishāñ pe hai ḳhuuñ sā jamā huā

yaaro ye us ke ghar kā kahīñ rāsta na ho

zaḳhmoñ kī mish.aleñ liye guzrā hai dil se kaun

yādoñ kā koī bhaTkā huā qāfila na ho

kab se khaḌā huuñ ek do-rāhe pe but banā

sab kuchh jo dekhtā ho magar boltā na ho

chūmo lagāo āñkhoñ se sar par rakkho use

ye zindagī varaq kisī injīl kā na ho

sau baar ik galī meñ mujhe le gayā ye vahm

khiḌkī se koī maslahatan jhāñktā na ho

sharmā ga.e the donoñ hī pahlī nazar ke baad

shāyad tumheñ to yaad bhī vo vāqi.a na ho

laao na mere sāmne aariz ke āftāb

chehre pe koī harf-e-tamannā likhā na ho

maazī ke reg-zār pe rakhnā sambhal ke paañv

bachchoñ kā is meñ koī gharauñdā banā na ho

ho kar judā bhī us se 'na.īmī' maiñ jī to luuñ

lekin ye Dar hai is se kahīñ vo ḳhafā na ho

gard-e-firaq ghaza kash-e-aina na ho

chaho jo tum to apne tasarruf mein kya na ho

sajde ke har nishan pe hai KHun sa jama hua

yaro ye us ke ghar ka kahin rasta na ho

zaKHmon ki mishalen liye guzra hai dil se kaun

yaadon ka koi bhaTka hua qafila na ho

kab se khaDa hun ek do-rahe pe but bana

sab kuchh jo dekhta ho magar bolta na ho

chumo lagao aankhon se sar par rakkho use

ye zindagi waraq kisi injil ka na ho

sau bar ek gali mein mujhe le gaya ye wahm

khiDki se koi maslahatan jhankta na ho

sharma gae the donon hi pahli nazar ke baad

shayad tumhein to yaad bhi wo waqia na ho

lao na mere samne aariz ke aaftab

chehre pe koi harf-e-tamanna likha na ho

mazi ke reg-zar pe rakhna sambhal ke panw

bachchon ka is mein koi gharaunda bana na ho

ho kar juda bhi us se 'naimi' main ji to lun

lekin ye Dar hai is se kahin wo KHafa na ho