gareban chaak karne se hamein fursat bhi milti hai

garebāñ chaak karne se hameñ fursat bhī miltī hai

rahe tū mehrbāñ to ilm kī daulat bhī miltī hai

ḳhudā rakkhe tujhe ai shā.irī terī badaulat hī

hameñ izzat bhī miltī hai hameñ shohrat bhī miltī hai

dar-e-jānāñ ko ham ne is liye ab tak nahīñ chhoḌā

jahāñ kuchh ranj miltā hai vahīñ rāhat bhī miltī hai

ibādat se faqat ḳhush-nūdī-e-maulā nahīñ miltī

sitam-gar tujh se laḌne kī hameñ himmat bhī miltī hai

ġhalat aa.e to hoñToñ par tabassum DhūñDne vaalo

yahāñ aañsū bahāne se kabhī mohlat bhī miltī hai

bahut hī soch kar apne qadam rakhnā ḳhirad vaalo

ye rāh-e-ishq hai is raah meñ vahshat bhī miltī hai

salāmat hai agar īmān ai 'tashna' yaqīñ kar lo

ki jis par naaz hai rizvāñ ko vo jannat bhī miltī hai

gareban chaak karne se hamein fursat bhi milti hai

rahe tu mehrban to ilm ki daulat bhi milti hai

KHuda rakkhe tujhe ai shairi teri badaulat hi

hamein izzat bhi milti hai hamein shohrat bhi milti hai

dar-e-jaanan ko hum ne is liye ab tak nahin chhoDa

jahan kuchh ranj milta hai wahin rahat bhi milti hai

ibaadat se faqat KHush-nudi-e-maula nahin milti

sitam-gar tujh se laDne ki hamein himmat bhi milti hai

ghalat aae to honTon par tabassum DhunDne walo

yahan aansu bahane se kabhi mohlat bhi milti hai

bahut hi soch kar apne qadam rakhna KHirad walo

ye rah-e-ishq hai is rah mein wahshat bhi milti hai

salamat hai agar iman ai 'tashna' yaqin kar lo

ki jis par naz hai rizwan ko wo jannat bhi milti hai