gharib aadmi ko ThaT padshahi ka

ġharīb aadmī ko ThaaT pādshāhī kā

ye pesh-ḳhema hai zālim tirī tabāhī kā

ḳhadañg-e-āh ko roke rahā huuñ furqat meñ

ḳhayāl hai mujhe aflāk kī tabāhī kā

umiid kaise ho mahshar meñ surḳh-rūī kī

hamesha kaam kiyā ho jo rū-siyāhī kā

salām tak nahīñ lete kalām to kaisā

faqīrī meñ bhī tabaḳhtūr hai bādshāhī kā

shikast-o-fat.h kā zimma nahīñ dil-e-nādāñ

laḌe hazār meñ ye kaam hai sipāhī kā

ḳhizāb karte haiñ duniyā se jab ga.e guzre

shugūn karte haiñ piirī meñ rū-siyāhī kā

na āsmāñ kī ināyat na mehrbāñ vo shoḳh

na pūchho haal ġharīboñ kī be-panāhī kā

safed bāloñ pe kis vāste ḳhizāb lagā.eñ

gayā zamāna javānī meñ rū-siyāhī kā

ḳhatā.eñ ho ga.iiñ ma.adūm haj se ai 'parvīñ'

gavāh ḳhud hai ḳhudā merī be-gunāhī kā

gharib aadmi ko ThaT padshahi ka

ye pesh-KHema hai zalim teri tabahi ka

KHadang-e-ah ko roke raha hun furqat mein

KHayal hai mujhe aflak ki tabahi ka

umid kaise ho mahshar mein surKH-rui ki

hamesha kaam kiya ho jo ru-siyahi ka

salam tak nahin lete kalam to kaisa

faqiri mein bhi tabaKHtur hai baadshahi ka

shikast-o-fath ka zimma nahin dil-e-nadan

laDe hazar mein ye kaam hai sipahi ka

KHizab karte hain duniya se jab gae guzre

shugun karte hain piri mein ru-siyahi ka

na aasman ki inayat na mehrban wo shoKH

na puchho haal gharibon ki be-panahi ka

safed baalon pe kis waste KHizab lagaen

gaya zamana jawani mein ru-siyahi ka

KHataen ho gain madum haj se ai 'parwin'

gawah KHud hai KHuda meri be-gunahi ka