gharib hum hain gharibon ki bhi KHushi ho jae

ġharīb ham haiñ ġharīboñ kī bhī ḳhushī ho jaa.e

nazar huzūr idhar bhī kabhī kabhī ho jaa.e

ġhurūr bhī jo karūñ maiñ to ājizī ho jaa.e

ḳhudī meñ lutf vo aa.e ki be-ḳhudī ho jaa.e

ġham-e-firāq kī saḳhtī visāl se badle

jo maut aa.e mujhe merī zindagī ho jaa.e

mirī sharāb kī kyā qadr tujh ko ai vaa.iz

jise maiñ pī ke duā duuñ vo jannatī ho jaa.e

maiñ us nigāh ke sadqe ye ho asar jis meñ

ki dil meñ dard bhī uTThe to gudgudī ho jaa.e

sitam bhī ho to sitam meñ vo lutf pinhāñ ho

ki naala aa ke mire hoñTh par hañsī ho jaa.e

na pūchho bāda-gusārān-e-bazm-e-'vāris' kī

ye dekh leñ sū-e-vā.iz to vo valī ho jaa.e

haTā rahā huuñ shab-o-roz is liye ḳhud ko

fanā ke raaz se mujh ko bhī āgahī ho jaa.e

tirī nigāh-e-karam se ajab nahīñ vāris

'riyāz' sā sag-e-duniyā bhī aadmī ho jaa.e

gharib hum hain gharibon ki bhi KHushi ho jae

nazar huzur idhar bhi kabhi kabhi ho jae

ghurur bhi jo karun main to aajizi ho jae

KHudi mein lutf wo aae ki be-KHudi ho jae

gham-e-firaq ki saKHti visal se badle

jo maut aae mujhe meri zindagi ho jae

meri sharab ki kya qadr tujh ko ai waiz

jise main pi ke dua dun wo jannati ho jae

main us nigah ke sadqe ye ho asar jis mein

ki dil mein dard bhi uTThe to gudgudi ho jae

sitam bhi ho to sitam mein wo lutf pinhan ho

ki nala aa ke mere honTh par hansi ho jae

na puchho baada-gusaran-e-bazm-e-'waris' ki

ye dekh len su-e-waiz to wo wali ho jae

haTa raha hun shab-o-roz is liye KHud ko

fana ke raaz se mujh ko bhi aagahi ho jae

teri nigah-e-karam se ajab nahin waris

'riyaz' sa sag-e-duniya bhi aadmi ho jae