zist ki garmi-e-bedar bhi laya suraj

ziist kī garmī-e-bedār bhī laayā sūraj

khul ga.ī aañkh mirī sar pe jo aayā sūraj

phir shu'ā'oñ ne mire jism pe dastak dī hai

phir jagāne mire ehsās ko aayā sūraj

kisī dulhan ke jhamakte hue jhūmar kī tarah

raat ne sub.h ke māthe pe sajāyā sūraj

shaam ko ruuTh gayā thā mujhe taḌpāne ko

sub.h-dam aap mujhe DhūñDne aayā sūraj

kam na thā us kā ye ehsān ki jaate jaate

kar gayā aur bhī lambā mirā saaya sūraj

Dālte us pe kamandeñ vo koī chāñd na thā

sau jatan sab ne kiye haath na aayā sūraj

ḳhuub vāqif thā vo insān ke andhe-pan se

jis ne bhī din ke ujāle meñ jalāyā sūraj

log kahte rahe sūraj ko dikhā.eñge charāġh

aur hī rang thā jab sāmne aayā sūraj

shab ko bhī ruuh ke āñgan meñ rahī dhuup 'qatīl'

chāñd tāroñ ne bhī aa kar na bujhāyā sūraj

zist ki garmi-e-bedar bhi laya suraj

khul gai aankh meri sar pe jo aaya suraj

phir shu'a'on ne mere jism pe dastak di hai

phir jagane mere ehsas ko aaya suraj

kisi dulhan ke jhamakte hue jhumar ki tarah

raat ne subh ke mathe pe sajaya suraj

sham ko ruTh gaya tha mujhe taDpane ko

subh-dam aap mujhe DhunDne aaya suraj

kam na tha us ka ye ehsan ki jate jate

kar gaya aur bhi lamba mera saya suraj

Dalte us pe kamanden wo koi chand na tha

sau jatan sab ne kiye hath na aaya suraj

KHub waqif tha wo insan ke andhe-pan se

jis ne bhi din ke ujale mein jalaya suraj

log kahte rahe suraj ko dikhaenge charagh

aur hi rang tha jab samne aaya suraj

shab ko bhi ruh ke aangan mein rahi dhup 'qatil'

chand taron ne bhi aa kar na bujhaya suraj