gaya ab aaftab-e-hashr ka bhi jalwa-gar hona

gayā ab āftāb-e-hashr kā bhī jalva-gar honā

shab-e-furqat hamārī hai ye kyā jaane sahar honā

vahāñ jā kar mire nāloñ kā yārab be-asar honā

qayāmat thā kisī kā raat ko dushman ke ghar honā

bahut achchhe haiñ jin par zulm hote haiñ zamāne ke

isī ko ahl-e-dil kahte haiñ manzūr-e-nazar honā

ḳhayāl ik nāznīñ kā dil meñ phir rah rah ke aatā hai

zarā siine meñ ab tham tham ke o dard-e-jigar honā

hazāroñ neshtar paivast hoñ jis kī rag-e-jāñ meñ

use dushvār hai marhūn-e-sa.ī-e-chārāgar honā

ye kyā kam hai milī qaid-e-qafas se mujh ko āzādī

mere kaam aa gayā āḳhir mirā be-bāl-o-par honā

bahut hī ibrat-añgez aur hasrat-ḳhez manzar hai

lahad par ek be-kas ke kisī kā nauhagar honā

irāde ḳhushk zāhid hauz-e-mai ho jā.eñge ḳhālī

koī āsāñ hai ai 'safdar' tere dāman kā tar honā

gaya ab aaftab-e-hashr ka bhi jalwa-gar hona

shab-e-furqat hamari hai ye kya jaane sahar hona

wahan ja kar mere nalon ka yarab be-asar hona

qayamat tha kisi ka raat ko dushman ke ghar hona

bahut achchhe hain jin par zulm hote hain zamane ke

isi ko ahl-e-dil kahte hain manzur-e-nazar hona

KHayal ek naznin ka dil mein phir rah rah ke aata hai

zara sine mein ab tham tham ke o dard-e-jigar hona

hazaron neshtar paiwast hon jis ki rag-e-jaan mein

use dushwar hai marhun-e-sai-e-chaaragar hona

ye kya kam hai mili qaid-e-qafas se mujh ko aazadi

mere kaam aa gaya aaKHir mera be-baal-o-par hona

bahut hi ibrat-angez aur hasrat-KHez manzar hai

lahad par ek be-kas ke kisi ka nauhagar hona

irade KHushk zahid hauz-e-mai ho jaenge KHali

koi aasan hai ai 'safdar' tere daman ka tar hona