gaya jawani ka sath sab kuchh wo garmi-e-ishq ab kahan hai

gayā javānī kā saath sab kuchh vo garmi-e-ishq ab kahāñ hai

jo maiñ ne us vaqt aah kī hai bujhī huī aag kā dhuāñ hai

lage bujhātā nahīñ vo dushman jalan ye hai pheñk rahā hai tan-man

charāġh sā dāġh-e-dil hai raushan diyā-salā.ī hai ustuḳhvāñ hai

tabī.at apnī hai kyuuñ mukaddar nahīñ samajhtā na samjhe dilbar

karegā dushman bhī rahm ham par agar ḳhudā apnā mehrbāñ hai

khule haiñ dāġhoñ ke phuul tan par bahār-e-tāza hai ai gul-e-tar

kabhī to merī taraf nazar kar chaman meñ kyā shāḳh-e-za.afrān hai

kabhī hai mānind-e-mauj-e-dariyā kabhī hai misl-e-ġhubār-e-sahrā

kahūñ maiñ kyā haal apne dil kā bichhaḌ ke mujh se ravāñ-davāñ hai

talaf hue jis meñ zindagānī basar hue jis meñ naujavānī

vo merī biitī huī kahānī suno agar shauq-e-dāstāñ hai

yahī haiñ ma.anī-e-ishq-e-kāmil ki sau balāoñ se huuñ muqābil

buland hai ab jo nāla-e-dil sipāh-e-andoh kā nishāñ hai

ḳhudā na dikhlā.e achchhī sūrat abhī to aa jaatī hai harārat

paḌegī be-shak nigāh-e-ulfat za.iif go maiñ huuñ dil javāñ hai

hazār afsos umr khoī na dekhā dīn-dār ham ne koī

hai vā.izoñ meñ fasāna-goī madrasoñ meñ chunīñ-chunāñ hai

barā-e-zar muttaqī bane haiñ husūl ke mas.ale chhine haiñ

murīd jo haiñ vo but bane haiñ matā-e-islām rā.egāñ hai

koī to 'saudā' kā hai muvassif koī 'taqī'-mīr kā muārrif

batāo ai dostān-e-munsif ka.ī hamārā bhī qadr-dāñ hai

sune hai maiñ ne fuġhān-e-bulbul bahār meñ hai mujhe ta.ammul

chaTak rahā hai jo ġhuncha-e-gul sadā-e-naqqāra-e-ḳhizāñ hai

kiyā hai kyuuñ 'bahr' se kinārā tirī judā.ī ne mujh ko maarā

are but-e-sañg-dil ḳhudā-rā bulā le mujh ko bhī to jahāñ hai

gaya jawani ka sath sab kuchh wo garmi-e-ishq ab kahan hai

jo main ne us waqt aah ki hai bujhi hui aag ka dhuan hai

lage bujhata nahin wo dushman jalan ye hai phenk raha hai tan-man

charagh sa dagh-e-dil hai raushan diya-salai hai ustuKHwan hai

tabiat apni hai kyun mukaddar nahin samajhta na samjhe dilbar

karega dushman bhi rahm hum par agar KHuda apna mehrban hai

khule hain daghon ke phul tan par bahaar-e-taza hai ai gul-e-tar

kabhi to meri taraf nazar kar chaman mein kya shaKH-e-zafran hai

kabhi hai manind-e-mauj-e-dariya kabhi hai misl-e-ghubar-e-sahra

kahun main kya haal apne dil ka bichhaD ke mujh se rawan-dawan hai

talaf hue jis mein zindagani basar hue jis mein naujawani

wo meri biti hui kahani suno agar shauq-e-dastan hai

yahi hain mani-e-ishq-e-kaamil ki sau balaon se hun muqabil

buland hai ab jo nala-e-dil sipah-e-andoh ka nishan hai

KHuda na dikhlae achchhi surat abhi to aa jati hai hararat

paDegi be-shak nigah-e-ulfat zaif go main hun dil jawan hai

hazar afsos umr khoi na dekha din-dar hum ne koi

hai waizon mein fasana-goi madrason mein chunin-chunan hai

bara-e-zar muttaqi bane hain husul ke masale chhine hain

murid jo hain wo but bane hain mata-e-islam raegan hai

koi to 'sauda' ka hai muwassif koi 'taqi'-mir ka muarrif

batao ai dostan-e-munsif kai hamara bhi qadr-dan hai

sune hai main ne fughan-e-bulbul bahaar mein hai mujhe tammul

chaTak raha hai jo ghuncha-e-gul sada-e-naqqara-e-KHizan hai

kiya hai kyun 'bahr' se kinara teri judai ne mujh ko mara

are but-e-sang-dil KHuda-ra bula le mujh ko bhi to jahan hai