mujhe KHwab-e-sarab-e-azab diye meri ruh ka naghma chhin liya

mujhe ḳhvāb-e-sarāb-e-azāb diye mirī ruuh kā naġhma chhīn liyā

āshob-e-malāl ishrat-e-jāñ 'vijdān' se kyā kyā chhīn liyā

ik ranj-e-safar kī dhuul mire chehre pe gard-e-malāl huī

ik kaif jo sañgī sāthī thā us kaif kā saaya chhīn liyā

mire haath bhī zaḳhm-e-dil kī tarah maiñ TuuT gayā sāhil kī tarah

ai dard-e-ġham-e-hijrāñ tū ne kyā mujh ko diyā kyā chhīn liyā

in rañgoñ meñ mirā rañg bhī thā in bātoñ meñ mirī baat bhī thī

mirā rañg miTā mirī baat kaTī kis ne mirā rasta chhīn liyā

ai shahr-e-alam mirī baat to sun tū ḳhvāb mire vāpas kar de

maiñ terā karam lauTā dūñgā tū ne mirā chehra chhīn liyā

maiñ nauhagarī tak bhuul gayā mire log jale mire shahr luTe

is shahr-e-ma.īshat ne mujh se ehsās kā dariyā chhīn liyā

ye sūd-o-ziyāñ kī bāteñ haiñ in bātoñ meñ kyā rakkhā hai

ik ḳhvāb-e-tamannā de ke mujhe ik ḳhvāb-e-tamannā chhīn liyā

mujhe KHwab-e-sarab-e-azab diye meri ruh ka naghma chhin liya

aashob-e-malal ishrat-e-jaan 'wijdan' se kya kya chhin liya

ek ranj-e-safar ki dhul mere chehre pe gard-e-malal hui

ek kaif jo sangi sathi tha us kaif ka saya chhin liya

mere hath bhi zaKHm-e-dil ki tarah main TuT gaya sahil ki tarah

ai dard-e-gham-e-hijran tu ne kya mujh ko diya kya chhin liya

in rangon mein mera rang bhi tha in baaton mein meri baat bhi thi

mera rang miTa meri baat kaTi kis ne mera rasta chhin liya

ai shahr-e-alam meri baat to sun tu KHwab mere wapas kar de

main tera karam lauTa dunga tu ne mera chehra chhin liya

main nauhagari tak bhul gaya mere log jale mere shahr luTe

is shahr-e-maishat ne mujh se ehsas ka dariya chhin liya

ye sud-o-ziyan ki baaten hain in baaton mein kya rakkha hai

ek KHwab-e-tamanna de ke mujhe ek KHwab-e-tamanna chhin liya