ghaneri chhanw ke sapne bahut dikhae gae

ghanerī chhāñv ke sapne bahut dikhā.e ga.e

savāl ye hai ki kitne shajar ugaa.e ga.e

milī hai aur hī ta.abīr aa ke manzil par

vo aur ḳhvāb the raste meñ jo dikhā.e ga.e

mire lahū se mujhe munhadim karāyā gayā

dayār-e-ġhair se lashkar kahāñ bulā.e ga.e

diye banā ke jalā.ī thiiñ uñgliyāñ ham ne

añdherī shab kī adālat meñ ham bhī laa.e ga.e

falak pe uḌte huoñ ko qafas meñ Daalā gayā

zamīñ pe reñgne vāloñ ko par lagā.e ga.e

hamāre naam kī taḳhtī bhī un pe lag na sakī

lahū meñ gūñdh ke miTTī jo ghar banā.e ga.e

mile the pahle se likkhe hue adālat ko

vo faisle jo hameñ ba.ad meñ sunā.e ga.e

tamām sa.ad sitāre bigaḌ ga.e 'az.har'

sulagtī ret pe jab zā.iche banā.e ga.e

ghaneri chhanw ke sapne bahut dikhae gae

sawal ye hai ki kitne shajar ugae gae

mili hai aur hi tabir aa ke manzil par

wo aur KHwab the raste mein jo dikhae gae

mere lahu se mujhe munhadim karaya gaya

dayar-e-ghair se lashkar kahan bulae gae

diye bana ke jalai thin ungliyan hum ne

andheri shab ki adalat mein hum bhi lae gae

falak pe uDte huon ko qafas mein Dala gaya

zamin pe rengne walon ko par lagae gae

hamare nam ki taKHti bhi un pe lag na saki

lahu mein gundh ke miTTi jo ghar banae gae

mile the pahle se likkhe hue adalat ko

wo faisle jo hamein baad mein sunae gae

tamam sad sitare bigaD gae 'azhar'

sulagti ret pe jab zaiche banae gae