ghanghor ghaTa ke aanchal ko jab kali raat nichoD gai

ghanghor ghaTā ke āñchal ko jab kaalī raat nichoḌ ga.ī

ik tanhā.ī ko chain milā ik tanhā.ī dam toḌ ga.ī

ai vaqt ke andhe rakhvālo ye raaz to ham bhī jānte haiñ

be-vaj.h tumhārī āñkhoñ se kyuuñ bīnā.ī muñh moḌ ga.ī

ik vo bhī safīna thā apnā jo sāhil sāhil ghuum gayā

ik ye bhī hamārī kashtī hai jo lahroñ meñ sar phoḌ ga.ī

har chand nazar ne tāroñ par shab-ḳhūn to maarā hai lekin

ye raat sahar ke dāman par kuchh daaġh lahū ke chhoḌ ga.ī

insān kā raushan mustaqbil jis vaqt charāġh-e-rāh banā

har manzil apne qadmoñ se tārīḳh kā naata joḌ ga.ī

ghanghor ghaTa ke aanchal ko jab kali raat nichoD gai

ek tanhai ko chain mila ek tanhai dam toD gai

ai waqt ke andhe rakhwalo ye raaz to hum bhi jaante hain

be-wajh tumhaari aankhon se kyun binai munh moD gai

ek wo bhi safina tha apna jo sahil sahil ghum gaya

ek ye bhi hamari kashti hai jo lahron mein sar phoD gai

har chand nazar ne taron par shab-KHun to mara hai lekin

ye raat sahar ke daman par kuchh dagh lahu ke chhoD gai

insan ka raushan mustaqbil jis waqt charagh-e-rah bana

har manzil apne qadmon se tariKH ka nata joD gai