ghani aabaadiyon ki be-amani ka tamasha kar

ghanī ābādiyoñ kī be-amānī kā tamāshā kar

nikal kar ghar se marg-e-nā-gahānī kā tamāshā kar

jo zinda aag meñ Daale ga.e lāsheñ na gin un kī

jo bach nikle haiñ un kī saḳht-jānī kā tamāshā kar

jo taḳht-o-tāj ke mālik haiñ kyā vo mo'tabar bhī haiñ

shar-añgezī meñ Duubī hukmarānī kā tamāshā kar

bachā kyā rah gayā kālak bhare jhulse makānoñ meñ

ujāḌī bastiyoñ kī be-nishānī kā tamāshā kar

na.ī tārīḳh ke safhoñ pe likkhā jā rahā hai kyā

hurūf-e-qahr kī ātish-fishānī kā tamāshā kar

jo dil meñ hai use nā-gufta rahne de to behtar hai

badaltī sūrat-e-harf-o-ma.ānī kā tamāshā kar

na koī ḳhvāb baaqī hai na aañsū ḳhushk āñkhoñ meñ

tahī-dastoñ kī gum-sum nauha-ḳhvānī kā tamāshā kar

har ik shab shukr kar terī abhī gardan salāmat hai

har ik din sail-e-ḳhūñ kī be-karānī kā tamāshā kar

qayāmat sar tak aa pahuñchī hai rakh le haath āñkhoñ par

matā-e-zindagī kī rā.egānī kā tamāshā kar

ghani aabaadiyon ki be-amani ka tamasha kar

nikal kar ghar se marg-e-na-gahani ka tamasha kar

jo zinda aag mein Dale gae lashen na gin un ki

jo bach nikle hain un ki saKHt-jaani ka tamasha kar

jo taKHt-o-taj ke malik hain kya wo mo'tabar bhi hain

shar-angezi mein Dubi hukmarani ka tamasha kar

bacha kya rah gaya kalak bhare jhulse makanon mein

ujaDi bastiyon ki be-nishani ka tamasha kar

nai tariKH ke safhon pe likkha ja raha hai kya

huruf-e-qahr ki aatish-fishani ka tamasha kar

jo dil mein hai use na-gufta rahne de to behtar hai

badalti surat-e-harf-o-maani ka tamasha kar

na koi KHwab baqi hai na aansu KHushk aankhon mein

tahi-daston ki gum-sum nauha-KHwani ka tamasha kar

har ek shab shukr kar teri abhi gardan salamat hai

har ek din sail-e-KHun ki be-karani ka tamasha kar

qayamat sar tak aa pahunchi hai rakh le hath aankhon par

mata-e-zindagi ki raegani ka tamasha kar