گھر ہے ترا تو شوق سے آنے کے لیے آ

گھر ہے ترا تو شوق سے آنے کے لیے آ

لیکن میں یہ چاہوں گا نہ جانے کے لیے آ

یہ رخ بھی محبت کا دکھانے کے لیے آ

آ مجھ سے نظر پھیر کے جانے کے لیے آ

مدت سے ہوں میں تیری ملاقات کا طالب

آ مجھ پہ کوئی ظلم ہی ڈھانے کے لیے آ

پیمانوں سے پیتے ہیں پئیں رند خرابات

تو مجھ کو نگاہوں سے پلانے کے لیے آ

ارباب خرد کو ہے بڑا ناز خرد پر

تو ان کو بھی دیوانہ بنانے کے لیے آ

کیا میں ترے اس لطف کے قابل بھی نہیں ہوں

اے جان وفا دل ہی دکھانے کے لیے آ

برداشت اسے عشق کی غیرت نہ کرے گی

کیوں تجھ سے کہوں میں کہ زمانے کے لیے آ