ghar hai wahshat-KHez aur basti ujaD

ghar hai vahshat-ḳhez aur bastī ujaaḌ

ho ga.ī ek ik ghaḌī tujh bin pahāḌ

aaj tak qasr-e-amal hai nā-tamām

bañdh chukī hai bār-hā khul khul ke paaḌ

hai pahuñchnā apnā choTī tak muhāl

ai talab niklā bahut ūñchā pahāḌ

khelnā aatā hai ham ko bhī shikār

par nahīñ zāhid koī TaTTī kī aaḌ

dil nahīñ raushan to haiñ kis kaam ke

sau shabistāñ meñ agar raushan haiñ jhaaḌ

iid aur nauroz hai sab dil ke saath

dil nahīñ hāzir to duniyā hai ujaaḌ

khet raste par hai aur rah-rau savār

kisht hai sarsabz aur nīchī hai baaḌ

baat vaa.iz kī koī pakḌī ga.ī

in dinoñ kam-tar hai kuchh ham par latāḌ

tum ne 'hālī' khol kar nāhaq zabāñ

kar liyā saarī ḳhudā.ī se bigāḌ

ghar hai wahshat-KHez aur basti ujaD

ho gai ek ek ghaDi tujh bin pahaD

aaj tak qasr-e-amal hai na-tamam

bandh chuki hai bar-ha khul khul ke paD

hai pahunchna apna choTi tak muhaal

ai talab nikla bahut uncha pahaD

khelna aata hai hum ko bhi shikar

par nahin zahid koi TaTTi ki aaD

dil nahin raushan to hain kis kaam ke

sau shabistan mein agar raushan hain jhaD

id aur nauroz hai sab dil ke sath

dil nahin hazir to duniya hai ujaD

khet raste par hai aur rah-rau sawar

kisht hai sarsabz aur nichi hai baD

baat waiz ki koi pakDi gai

in dinon kam-tar hai kuchh hum par lataD

tum ne 'haali' khol kar nahaq zaban

kar liya sari KHudai se bigaD