ghar mein hun go hunut-shuda lash ki tarah

ghar meñ huuñ go hunūt-shuda laash kī tarah

phirtī hai ruuh shahr meñ obāsh kī tarah

bāzīcha-e-farā.ina-e-misr dekhnā

ham āhanī giraft meñ haiñ taash kī tarah

ye jān-e-nā-tavāñ bhī hai kyā samra-e-hayāt

rakh dī ga.ī hai kaaT ke ik qaash kī tarah

sukh kī zamīñ basīt nahīñ hai to kyā huā

dukh to mirā vishāl hai ākāsh kī tarah

shāyad mirā vajūd hī pasmāñda ḳhaak ho

ḳhālī hai bazm-e-yār meñ qallāsh kī tarah

khiñchtā chalā huuñ maiñ kisī pātāl kī taraf

har anjuman hai markaz-e-purḳhāsh kī tarah

sau baar masḳh ho ke bhī ta.amīr-e-zindagī

pur-nūr hai manāra-e-zau-pāsh kī tarah

baaqī hai ham se dāman-e-roz-e-jazā kī laaj

go zindagī atā huī pādāsh kī tarah

ghar mein hun go hunut-shuda lash ki tarah

phirti hai ruh shahr mein obash ki tarah

bazicha-e-faraina-e-misr dekhna

hum aahani giraft mein hain tash ki tarah

ye jaan-e-na-tawan bhi hai kya samra-e-hayat

rakh di gai hai kaT ke ek qash ki tarah

sukh ki zamin basit nahin hai to kya hua

dukh to mera wishaal hai aakash ki tarah

shayad mera wajud hi pasmanda KHak ho

KHali hai bazm-e-yar mein qallash ki tarah

khinchta chala hun main kisi patal ki taraf

har anjuman hai markaz-e-purKHash ki tarah

sau bar masKH ho ke bhi tamir-e-zindagi

pur-nur hai manara-e-zau-pash ki tarah

baqi hai hum se daman-e-roz-e-jaza ki laj

go zindagi ata hui padash ki tarah