ghar na dar kuchh nahin raha mahfuz

ghar na dar kuchh nahīñ rahā mahfūz

hai ġhanīmat ki sar rahā mahfūz

luT gayā dil to kyā rahā mahfūz

un kā ġham merā hausla mahfūz

rahnumāoñ kī ham ko hājat kyā

ham ne rakhā hai hausla mahfūz

ishq-e-paiham se chashm-e-pur-nam se

koī duniyā meñ kab rahā mahfūz

ham ko munkir na tū samajh vaa.iz

dil meñ har samt hai ḳhudā mahfūz

aap par miT ke ham rahe gumnām

aap kī har adā adā mahfūz

baar baar un ke dar pe jaane se

fāsloñ ne hameñ rakhā mahfūz

ab kī kaisī chalī ye bād-e-sumūm

jaan mahfūz na ridā mahfūz

aaj ik jām-e-ḳhās mere naam

mere saaqī ne rakh liyā mahfūz

TuuT kar ham bikhar ga.e hote

jo na rakhte ye hausla mahfūz

har hazīmat ke ba.ad 'farzāna'

dil bechārā kahāñ rahā mahfūz

ghar na dar kuchh nahin raha mahfuz

hai ghanimat ki sar raha mahfuz

luT gaya dil to kya raha mahfuz

un ka gham mera hausla mahfuz

rahnumaon ki hum ko hajat kya

hum ne rakha hai hausla mahfuz

ishq-e-paiham se chashm-e-pur-nam se

koi duniya mein kab raha mahfuz

hum ko munkir na tu samajh waiz

dil mein har samt hai KHuda mahfuz

aap par miT ke hum rahe gumnam

aap ki har ada ada mahfuz

bar bar un ke dar pe jaane se

faslon ne hamein rakha mahfuz

ab ki kaisi chali ye baad-e-sumum

jaan mahfuz na rida mahfuz

aaj ek jam-e-KHas mere nam

mere saqi ne rakh liya mahfuz

TuT kar hum bikhar gae hote

jo na rakhte ye hausla mahfuz

har hazimat ke baad 'farzana'

dil bechaara kahan raha mahfuz