ghar se hum ghar talak gae honge

ghar se ham ghar talak ga.e hoñge

apne hī aap tak ga.e hoñge

ham jo ab aadmī haiñ pahle kabhī

jaam hoñge chhalak ga.e hoñge

vo bhī ab ham se thak gayā hogā

ham bhī ab us se thak ga.e hoñge

shab jo ham se huā muaaf karo

nahīñ pī thī bahak ga.e hoñge

kitne hī log hirs-e-shohrat meñ

daar par ḳhud laTak ga.e hoñge

shukr hai is nigāh-e-kam kā miyāñ

pahle hī ham khaTak ga.e hoñge

ham to apnī talāsh meñ aksar

az samā-tā-samak ga.e hoñge

us kā lashkar jahāñ-tahāñ ya.anī

ham bhī bas be-kumak ga.e hoñge

'jaun' allāh aur ye aalam

biich meñ ham aTak ga.e hoñge

ghar se hum ghar talak gae honge

apne hi aap tak gae honge

hum jo ab aadmi hain pahle kabhi

jam honge chhalak gae honge

wo bhi ab hum se thak gaya hoga

hum bhi ab us se thak gae honge

shab jo hum se hua muaf karo

nahin pi thi bahak gae honge

kitne hi log hirs-e-shohrat mein

dar par KHud laTak gae honge

shukr hai is nigah-e-kam ka miyan

pahle hi hum khaTak gae honge

hum to apni talash mein aksar

az sama-ta-samak gae honge

us ka lashkar jahan-tahan yani

hum bhi bas be-kumak gae honge

'jaun' allah aur ye aalam

bich mein hum aTak gae honge