ghar se jo shaKHs bhi nikle wo sambhal kar nikle

ghar se jo shaḳhs bhī nikle vo sambhal kar nikle

jaane kis moḌ pe kis haath meñ ḳhanjar nikle

mo.ajaza ban ga.ī kyā aaj mirī tishna-labī

ek qatre ke tale kitne samundar nikle

gir gayā ho jo fasīloñ ko uThā kar ḳhud hī

kaise ab apne hisāroñ se vo bāhar nikle

rahbaro tum ne to manzil kā patā bhī na diyā

tum se behtar to mirī raah ke patthar nikle

umr bhar zehn meñ chubhtā rahā ik nashtar-e-ġham

jitne ehsās the sab merā muqaddar nikle

tum se chhoḌī na ga.ī rāh-e-vafā phir bhī 'hayāt'

kitne be-dard mile kitne sitamgar nikle

ghar se jo shaKHs bhi nikle wo sambhal kar nikle

jaane kis moD pe kis hath mein KHanjar nikle

moajaza ban gai kya aaj meri tishna-labi

ek qatre ke tale kitne samundar nikle

gir gaya ho jo fasilon ko uTha kar KHud hi

kaise ab apne hisaron se wo bahar nikle

rahbaro tum ne to manzil ka pata bhi na diya

tum se behtar to meri rah ke patthar nikle

umr bhar zehn mein chubhta raha ek nashtar-e-gham

jitne ehsas the sab mera muqaddar nikle

tum se chhoDi na gai rah-e-wafa phir bhi 'hayat'

kitne be-dard mile kitne sitamgar nikle