ghiste ghiste panw mein zanjir aadhi rah gai

ghiste ghiste paañv meñ zanjīr aadhī rah ga.ī

aadhī chhuTne kī huī tadbīr aadhī rah ga.ī

niim bismil ho ke maiñ taḌpā to vo kahne lage

chuuk tujh se ho ga.ī ta.azīr aadhī rah ga.ī

shaam se thī aamad aamad nisf shab ko aa.e vo

yāvarī kar ke mirī taqdīr aadhī rah ga.ī

nisf shahr us gesu-e-mushkīñ ne dil-basta kiyā

ḳhusrav-e-tātār kī tauqīr aadhī rah ga.ī

chaudhvīñ shab nā-mubārak māh-e-kāmil ko huī

nisf mansab ho gayā jāgīr aadhī rah ga.ī

tez kab tak hogī kab tak baaḌh rakkhī jā.egī

ab to ai qātil tirī shamshīr aadhī rah ga.ī

aadhe dhaḌ kā dam nikaltā thā ki aayā ḳhatt-e-shauq

paḌhte paḌhte mar ga.e tahrīr aadhī rah ga.ī

rañg phirne bhī na paayā thā ki ḳhud-rafta huā

ban ke 'mānī' se tirī tasvīr aadhī rah ga.ī

nisf shab tak dī tasallī phir vo yūsuf uTh gayā

ḳhvāb-e-hasrat kī mirī ta.abīr aadhī rah ga.ī

ḳhud kahā qātil se maiñ ne phir dobāra zab.h kar

kaT ke jab gardan dam-e-takbīr aadhī rah ga.ī

dopahar raat aa chukī jab guftugū kī ishq kī

yaar se aadhī huī taqrīr aadhī rah ga.ī

imtihān meñ kundanī rañg un kā duunā ho gayā

uḌte uḌte surḳhī-e-iksīr aadhī rah ga.ī

ai parī-rū jald zindāñ meñ 'sharaf' kī le ḳhabar

TukḌe kar ke pheñk dī zanjīr aadhī rah ga.ī

ghiste ghiste panw mein zanjir aadhi rah gai

aadhi chhuTne ki hui tadbir aadhi rah gai

nim bismil ho ke main taDpa to wo kahne lage

chuk tujh se ho gai tazir aadhi rah gai

sham se thi aamad aamad nisf shab ko aae wo

yawari kar ke meri taqdir aadhi rah gai

nisf shahr us gesu-e-mushkin ne dil-basta kiya

KHusraw-e-tatar ki tauqir aadhi rah gai

chaudhwin shab na-mubarak mah-e-kaamil ko hui

nisf mansab ho gaya jagir aadhi rah gai

tez kab tak hogi kab tak baDh rakkhi jaegi

ab to ai qatil teri shamshir aadhi rah gai

aadhe dhaD ka dam nikalta tha ki aaya KHatt-e-shauq

paDhte paDhte mar gae tahrir aadhi rah gai

rang phirne bhi na paya tha ki KHud-rafta hua

ban ke 'mani' se teri taswir aadhi rah gai

nisf shab tak di tasalli phir wo yusuf uTh gaya

KHwab-e-hasrat ki meri tabir aadhi rah gai

KHud kaha qatil se main ne phir dobara zabh kar

kaT ke jab gardan dam-e-takbir aadhi rah gai

dopahar raat aa chuki jab guftugu ki ishq ki

yar se aadhi hui taqrir aadhi rah gai

imtihan mein kundani rang un ka duna ho gaya

uDte uDte surKHi-e-iksir aadhi rah gai

ai pari-ru jald zindan mein 'sharaf' ki le KHabar

TukDe kar ke phenk di zanjir aadhi rah gai