ghup andhera tha ja-ba-ja mujh mein

ghup añdherā thā jā-ba-jā mujh meñ

raat rahtī thī bā-ḳhudā mujh meñ

maiñ to sar ko jhukā.e baiThā thā

ishq ne sar uThā liyā mujh meñ

ġham yahāñ se nikal nahīñ paayā

chaar jānib thā hāshiya mujh meñ

merā hī ruup dhaar kar koī

der tak chīḳhtā rahā mujh meñ

jaane kis kis ne raat kaaTī yahāñ

jaane kis kis ko tū milā mujh meñ

chhat girā.ī to rāsta niklā

phir tamāshā sā lag gayā mujh meñ

merī tah tak pahuñch nahīñ paayā

ek patthar jo gir paḌā mujh meñ

terī āvāz gūñjtī thī kabhī

ab to rahtā hai bas ḳhalā mujh meñ

saare manzar chhupā diye us ne

vo jo terā ġhubār thā mujh meñ

phal hī phal the yahāñ vahāñ 'mohsin'

ik shajar thā jhukā huā mujh meñ

ghup andhera tha ja-ba-ja mujh mein

raat rahti thi ba-KHuda mujh mein

main to sar ko jhukae baiTha tha

ishq ne sar uTha liya mujh mein

gham yahan se nikal nahin paya

chaar jaanib tha hashiya mujh mein

mera hi rup dhaar kar koi

der tak chiKHta raha mujh mein

jaane kis kis ne raat kaTi yahan

jaane kis kis ko tu mila mujh mein

chhat girai to rasta nikla

phir tamasha sa lag gaya mujh mein

meri tah tak pahunch nahin paya

ek patthar jo gir paDa mujh mein

teri aawaz gunjti thi kabhi

ab to rahta hai bas KHala mujh mein

sare manzar chhupa diye us ne

wo jo tera ghubar tha mujh mein

phal hi phal the yahan wahan 'mohsin'

ek shajar tha jhuka hua mujh mein