ghum-phir kar isi kuche ki taraf aaenge

ghūm-phir kar isī kūche kī taraf ā.eñge

dil se nikle bhī agar ham to kahāñ jā.eñge

ham ko ma.alūm thā ye vaqt bhī aa jā.egā

haañ magar ye nahīñ sochā thā ki pachhtā.eñge

ye bhī tai hai ki jo bo.eñge vo kāTeñge yahāñ

aur ye bhī ki jo kho.eñge vahī pā.eñge

kabhī fursat se milo to tumheñ tafsīl ke saath

imtiyāz-e-havas-o-ishq bhī samjhā.eñge

kah chuke ham hameñ itnā hī faqat kahnā thā

aap farmā.iye kuchh aap bhī farmā.eñge

ek din ḳhud ko nazar ā.eñge ham bhī 'ajmal'

ek din apnī hī āvāz se Takrā.eñge

ghum-phir kar isi kuche ki taraf aaenge

dil se nikle bhi agar hum to kahan jaenge

hum ko malum tha ye waqt bhi aa jaega

han magar ye nahin socha tha ki pachhtaenge

ye bhi tai hai ki jo boenge wo kaTenge yahan

aur ye bhi ki jo khoenge wahi paenge

kabhi fursat se milo to tumhein tafsil ke sath

imtiyaz-e-hawas-o-ishq bhi samjhaenge

kah chuke hum hamein itna hi faqat kahna tha

aap farmaiye kuchh aap bhi farmaenge

ek din KHud ko nazar aaenge hum bhi 'ajmal'

ek din apni hi aawaz se Takraenge