ghum rahe hain aangan aangan chand hawa aur main

ghuum rahe haiñ āñgan āñgan chāñd havā aur maiñ

DhūñD rahe haiñ bichhḌā bachpan chāñd havā aur maiñ

bhūlā-bisrā afsāna haiñ aaj us ke nazdīk

kal tak the jis dil kī dhaḌkan chāñd havā aur maiñ

ḳhvāboñ se be-nām jazīroñ meñ ghūme sau baar

yādoñ kā thāme hue dāman chāñd havā aur maiñ

apne hī ghar meñ haiñ yā sahrā meñ garm-e-safar

kyūñkar suljhā.eñ ye uljhan chāñd havā aur maiñ

aaj ke daur meñ apnī hī pahchān huī dushvār

dekh rahe haiñ vaqt kā darpan chāñd havā aur maiñ

rañg kā haala ḳhushbū kā ik jhoñkā kuchh to mile

kab se haiñ āvāra-e-gulshan chāñd havā aur maiñ

parchhā.īñ ke pīchhe bhāge kho.e ḳhalāoñ meñ

nikle aap hī apne dushman chāñd havā aur maiñ

jaane kis kī kaun hai manzil phir bhī haiñ ik saath

ghuum rahe haiñ tīnoñ ban ban chāñd havā aur maiñ

uryānī kā dosh kise deñ apnī hai taqdīr

ḳhud hī jalā baiThe pairāhan chāñd havā aur maiñ

ghum rahe hain aangan aangan chand hawa aur main

DhunD rahe hain bichhDa bachpan chand hawa aur main

bhula-bisra afsana hain aaj us ke nazdik

kal tak the jis dil ki dhaDkan chand hawa aur main

KHwabon se be-nam jaziron mein ghume sau bar

yaadon ka thame hue daman chand hawa aur main

apne hi ghar mein hain ya sahra mein garm-e-safar

kyunkar suljhaen ye uljhan chand hawa aur main

aaj ke daur mein apni hi pahchan hui dushwar

dekh rahe hain waqt ka darpan chand hawa aur main

rang ka haala KHushbu ka ek jhonka kuchh to mile

kab se hain aawara-e-gulshan chand hawa aur main

parchhain ke pichhe bhage khoe KHalaon mein

nikle aap hi apne dushman chand hawa aur main

jaane kis ki kaun hai manzil phir bhi hain ek sath

ghum rahe hain tinon ban ban chand hawa aur main

uryani ka dosh kise den apni hai taqdir

KHud hi jala baiThe pairahan chand hawa aur main