giton ka shahr hai ki nagar soz-o-saz ka

gītoñ kā shahr hai ki nagar soz-o-sāz kā

qalb-e-shikasta aur ye aalam gudāz kā

chāroñ taraf sajī haiñ dukāneñ ḳhulūs kī

chamkā hai kārobār har ik hīlā-sāz kā

vo chāhe ḳhvāb ho ki haqīqat magar kabhī

ehsāñ uThā.egā na libās-e-majāz kā

jis tarah chāhā jaa.e hai chāhā nahīñ abhī

andesha jaan khaa.e hai ifshā-e-rāz kā

bahrūpiyā hai koī phire hai nagar nagar

qātil kā ruup dhāre kabhī chārasāz kā

yuuñ hañste hañste dār-e-fanā se chalā hai vo

jaise safar nasīb ho arz-e-hijāz kā

'ābid' ġhamoñ kī dhuup meñ jalnā hai chaar din

bas qissa muḳhtasar hai ye umr-e-darāz kā

giton ka shahr hai ki nagar soz-o-saz ka

qalb-e-shikasta aur ye aalam gudaz ka

chaaron taraf saji hain dukanen KHulus ki

chamka hai karobar har ek hila-saz ka

wo chahe KHwab ho ki haqiqat magar kabhi

ehsan uThaega na libas-e-majaz ka

jis tarah chaha jae hai chaha nahin abhi

andesha jaan khae hai ifsha-e-raaz ka

bahrupiya hai koi phire hai nagar nagar

qatil ka rup dhaare kabhi chaarasaz ka

yun hanste hanste dar-e-fana se chala hai wo

jaise safar nasib ho arz-e-hijaz ka

'abid' ghamon ki dhup mein jalna hai chaar din

bas qissa muKHtasar hai ye umr-e-daraaz ka