gil hai aariz to qadd-e-yar daraKHt

gil hai aariz to qadd-e-yār daraḳht

kab ho aisā bahār-dār daraḳht

rashk se ik nihāl qad ke tire

kaT ga.e jal ga.e hazār daraḳht

ḳhvāhish-e-sañg thī jo majnūñ ko

qabr par bhī hai meva-dār daraḳht

kis kī vahshat ne ḳhaak uḌaa.ī hai

dasht meñ haiñ jo pur-ġhubār daraḳht

dāman-e-yār us se uljhegā

ho na gulshan meñ ḳhār-dār daraḳht

nāla-e-kohkan se jal uTThe

the jo bālā-e-kohsār daraḳht

dast-e-rañgīñ kā us ke kushta huuñ

ho hinā kā sar-e-mazār daraḳht

jis jagah dafn thā ye soḳhta-jāñ

na ugā vaañ se zīnhār daraḳht

zīnat-e-ḳhāna-bāġh kaun hai aaj

sajda karte haiñ bār-dār daraḳht

barg malte haiñ jo kaf-e-afsos

kis ke ġham meñ haiñ sogvār daraḳht

gulshan-e-ishq kā tamāshā dekh

sar-e-mansūr phal hai daar daraḳht

dekheñ gar tere qad kī bālā.ī

sar uThā.eñ na zīnhār daraḳht

be-samar ik rahā ye naḳhl-e-murād

yuuñ to phūle-phale hazār daraḳht

terī duurī meñ ai gul-e-ḳhūbī

suukh kar ho ga.e haiñ zaar daraḳht

saf-ba-saf haiñ khaḌe jo gulshan meñ

kab se bāñdhe hue qatār daraḳht

dekhte haiñ sū-e-dar-e-gulzār

kis ke haiñ mahv-e-intizār daraḳht

mausam-e-gul hai josh-e-mastī hai

laa.e gulshan meñ barg-o-bār daraḳht

jī meñ aatā hai mai-kashī kiije

taak kar koī sāya-dār daraḳht

ālam-e-sheb meñ huuñ yuuñ 'ġhāfil'

baaġh meñ jaise be-bahār daraḳht

gil hai aariz to qadd-e-yar daraKHt

kab ho aisa bahaar-dar daraKHt

rashk se ek nihaal qad ke tere

kaT gae jal gae hazar daraKHt

KHwahish-e-sang thi jo majnun ko

qabr par bhi hai mewa-dar daraKHt

kis ki wahshat ne KHak uDai hai

dasht mein hain jo pur-ghubar daraKHt

daman-e-yar us se uljhega

ho na gulshan mein KHar-dar daraKHt

nala-e-kohkan se jal uTThe

the jo baala-e-kohsar daraKHt

dast-e-rangin ka us ke kushta hun

ho hina ka sar-e-mazar daraKHt

jis jagah dafn tha ye soKHta-jaan

na uga wan se zinhaar daraKHt

zinat-e-KHana-bagh kaun hai aaj

sajda karte hain bar-dar daraKHt

barg malte hain jo kaf-e-afsos

kis ke gham mein hain sogwar daraKHt

gulshan-e-ishq ka tamasha dekh

sar-e-mansur phal hai dar daraKHt

dekhen gar tere qad ki baalai

sar uThaen na zinhaar daraKHt

be-samar ek raha ye naKHl-e-murad

yun to phule-phale hazar daraKHt

teri duri mein ai gul-e-KHubi

sukh kar ho gae hain zar daraKHt

saf-ba-saf hain khaDe jo gulshan mein

kab se bandhe hue qatar daraKHt

dekhte hain su-e-dar-e-gulzar

kis ke hain mahw-e-intizar daraKHt

mausam-e-gul hai josh-e-masti hai

lae gulshan mein barg-o-bar daraKHt

ji mein aata hai mai-kashi kije

tak kar koi saya-dar daraKHt

aalam-e-sheb mein hun yun 'ghafil'

bagh mein jaise be-bahaar daraKHt