gila fuzul tha ahd-e-wafa ke hote hue

gila fuzūl thā ahd-e-vafā ke hote hue

so chup rahā sitam-e-nā-ravā ke hote hue

ye qurbatoñ meñ ajab fāsle paḌe ki mujhe

hai āshnā kī talab āshnā ke hote hue

vo hīla-gar haiñ jo majbūriyāñ shumār kareñ

charāġh ham ne jalā.e havā ke hote hue

na chāhne pe bhī tujh ko ḳhudā se maañg liyā

ye haal hai dil-e-be-mudda.ā ke hote hue

na kar kisī pe bharosa ki kashtiyāñ Dūbeñ

ḳhudā ke hote hue nāḳhudā ke hote hue

magar ye ahl-e-riyā kis qadar barahna haiñ

galīm o dalq o abā o qabā ke hote hue

kise ḳhabar hai ki kāsa-ba-dast phirte haiñ

bahut se log saroñ par humā ke hote hue

'farāz' aise bhī lamhe kabhī kabhī aa.e

ki dil-girafta rahe dilrubā ke hote hue

gila fuzul tha ahd-e-wafa ke hote hue

so chup raha sitam-e-na-rawa ke hote hue

ye qurbaton mein ajab fasle paDe ki mujhe

hai aashna ki talab aashna ke hote hue

wo hila-gar hain jo majburiyan shumar karen

charagh hum ne jalae hawa ke hote hue

na chahne pe bhi tujh ko KHuda se mang liya

ye haal hai dil-e-be-muddaa ke hote hue

na kar kisi pe bharosa ki kashtiyan Duben

KHuda ke hote hue naKHuda ke hote hue

magar ye ahl-e-riya kis qadar barahna hain

galim o dalq o aba o qaba ke hote hue

kise KHabar hai ki kasa-ba-dast phirte hain

bahut se log saron par huma ke hote hue

'faraaz' aise bhi lamhe kabhi kabhi aae

ki dil-girafta rahe dilruba ke hote hue