gila hai shauq ko dil mein bhi tangi-e-ja ka

gila hai shauq ko dil meñ bhī tañgi-e-jā kā

guhar meñ mahv huā iztirāb dariyā kā

ye jāntā huuñ ki tū aur pāsuḳh-e-maktūb

magar sitam-zada huuñ zauq-e-ḳhāma-farsā kā

hinā-e-pā-e-ḳhizāñ hai bahār agar hai yahī

davām-e-kulfat-e-ḳhātir hai aish duniyā kā

ġham-e-firāq meñ taklīf-e-sair-e-bāġh na do

mujhe dimāġh nahīñ ḳhanda-hā-e-bejā kā

hanūz mahrami-e-husn ko tarastā huuñ

kare hai har-bun-e-mū kaam chashm-e-bīnā kā

dil us ko pahle hī nāz-o-adā se de baiThe

hameñ dimāġh kahāñ husn ke taqāzā kā

na kah ki girya ba-miqdār-e-hasrat-e-dil hai

mirī nigāh meñ hai jam-o-ḳharch dariyā kā

falak ko dekh ke kartā huuñ us ko yaad 'asad'

jafā meñ us kī hai andāz kār-farmā kā

mirā shumūl har ik dil ke pech-o-tāb meñ hai

maiñ mudda.ā huuñ tapish-nāma-e-tamannā kā

milī na vus.at-e-jaulān yak junūñ ham ko

adam ko le ga.e dil meñ ġhubār sahrā kā

gila hai shauq ko dil mein bhi tangi-e-ja ka

guhar mein mahw hua iztirab dariya ka

ye jaanta hun ki tu aur pasuKH-e-maktub

magar sitam-zada hun zauq-e-KHama-farsa ka

hina-e-pa-e-KHizan hai bahaar agar hai yahi

dawam-e-kulfat-e-KHatir hai aish duniya ka

gham-e-firaq mein taklif-e-sair-e-bagh na do

mujhe dimagh nahin KHanda-ha-e-beja ka

hanuz mahrami-e-husn ko tarasta hun

kare hai har-bun-e-mu kaam chashm-e-bina ka

dil us ko pahle hi naz-o-ada se de baiThe

hamein dimagh kahan husn ke taqaza ka

na kah ki girya ba-miqdar-e-hasrat-e-dil hai

meri nigah mein hai jam-o-KHarch dariya ka

falak ko dekh ke karta hun us ko yaad 'asad'

jafa mein us ki hai andaz kar-farma ka

mera shumul har ek dil ke pech-o-tab mein hai

main muddaa hun tapish-nama-e-tamanna ka

mili na wusat-e-jaulan yak junun hum ko

adam ko le gae dil mein ghubar sahra ka