gila use hai agar aa ke ru-baru to kare

gila use hai agar aa ke rū-barū to kare

yaqīñ kare na kare ham se guftugū to kare

vo bad-gumāñ hai to iqrār kyoñ nahīñ kartā

vo sargirāñ hai to iz.hār dū-badū to kare

vo kyoñ hai chīñ-ba-jabīñ raaz to khule āḳhir

charāġh-pā hai vo kyoñ koī justujū to kare

na barq hai na sharāra na sho’la-e-ḳhurshīd

magar nigāh koī us ke rū-barū to kare

maiñ kyā kahūñ lab-e-goyā ne saath chhoḌ diyā

vo kah rahe haiñ ki ye sharh-e-ārzū to kare

shikast ho ke bhī be-dast-o-pā na ho koī

jo aur kuchh na kare hifz-e-ābrū to kare

tamām ho kisī sūrat ye dāstān-e-sitam

vo ḳhatm kashmakash-e-ḳhanjar-o-gulū to kare

kare na 'bazm' koī gum-rahī pe tā’na-zanī

maiñ kho gayā huuñ koī merī justujū to kare

gila use hai agar aa ke ru-baru to kare

yaqin kare na kare hum se guftugu to kare

wo bad-guman hai to iqrar kyon nahin karta

wo sargiran hai to izhaar du-badu to kare

wo kyon hai chin-ba-jabin raaz to khule aaKHir

charagh-pa hai wo kyon koi justuju to kare

na barq hai na sharara na sho’la-e-KHurshid

magar nigah koi us ke ru-baru to kare

main kya kahun lab-e-goya ne sath chhoD diya

wo kah rahe hain ki ye sharh-e-arzu to kare

shikast ho ke bhi be-dast-o-pa na ho koi

jo aur kuchh na kare hifz-e-abru to kare

tamam ho kisi surat ye dastan-e-sitam

wo KHatm kashmakash-e-KHanjar-o-gulu to kare

kare na 'bazm' koi gum-rahi pe ta’na-zani

main kho gaya hun koi meri justuju to kare