gir paDa tu aaKHiri zine ko chhu kar kis liye

gir paḌā tū āḳhirī ziine ko chhū kar kis liye

aa gayā phir āsmānoñ se zamīñ par kis liye

ā.īna-ḳhānoñ meñ chhup kar rahne vaale aur haiñ

tum ne hāthoñ meñ uThā rakkhe haiñ patthar kis liye

maiñ ne apnī har masarrat dūsroñ ko baḳhsh dī

phir ye hañgāma bapā hai ghar se bāhar kis liye

aks paḌte hī musavvir kā qalam tharrā gayā

naqsh ik āb-e-ravāñ par hai ujāgar kis liye

ek hī fankār ke shahkār haiñ duniyā ke log

koī bartar kis liye hai koī kam-tar kis liye

ḳhushbuoñ ko mausamoñ kā zahr piinā hai abhī

apnī sāñseñ kar rahe ho yuuñ mo.attar kis liye

itnī ahmiyat ke qābil to na thā miTTī kā ghar

ek nuqte meñ simaT aayā samundar kis liye

pūchhtā huuñ sab se afzal koī batlātā nahīñ

bebasī kī maut marte haiñ suḳhan-var kis liye

gir paDa tu aaKHiri zine ko chhu kar kis liye

aa gaya phir aasmanon se zamin par kis liye

aaina-KHanon mein chhup kar rahne wale aur hain

tum ne hathon mein uTha rakkhe hain patthar kis liye

main ne apni har masarrat dusron ko baKHsh di

phir ye hangama bapa hai ghar se bahar kis liye

aks paDte hi musawwir ka qalam tharra gaya

naqsh ek aab-e-rawan par hai ujagar kis liye

ek hi fankar ke shahkar hain duniya ke log

koi bartar kis liye hai koi kam-tar kis liye

KHushbuon ko mausamon ka zahr pina hai abhi

apni sansen kar rahe ho yun moattar kis liye

itni ahmiyat ke qabil to na tha miTTi ka ghar

ek nuqte mein simaT aaya samundar kis liye

puchhta hun sab se afzal koi batlata nahin

bebasi ki maut marte hain suKHan-war kis liye