gir paDe dant hue mu-e-sar ai yar safed

gir paḌe daañt hue mū-e-sar ai yaar safed

kyuuñ na ho ḳhauf-e-ajal se ye siyahkār safed

do qadam fart-e-nazākat se nahīñ chal saktā

rañg ho jaatā hai us kā dam-e-raftār safed

us masīhā kī jo āñkheñ huiiñ gulzār meñ surḳh

ho ga.ī ḳhauf se bas nargis-e-bīmār safed

gul-e-nasrīñ ko nahīñ josh chaman meñ bulbul

hai nazākat ke sabab chehra-e-gulzār safed

ghar mire shab ko jo vo rashk-e-qamar aa niklā

ho ga.e partav-e-ruḳh se dar o dīvār safed

lab o dandāñ ke tasavvur meñ jo royā maiñ kabhī

ashk do-chār bahe surḳh to do-chār safed

huī sarsabz jo sohbat meñ 'amānat' kī ġhazal

rañg dushman kā huā rashk se ik baar safed

gir paDe dant hue mu-e-sar ai yar safed

kyun na ho KHauf-e-ajal se ye siyahkar safed

do qadam fart-e-nazakat se nahin chal sakta

rang ho jata hai us ka dam-e-raftar safed

us masiha ki jo aankhen huin gulzar mein surKH

ho gai KHauf se bas nargis-e-bimar safed

gul-e-nasrin ko nahin josh chaman mein bulbul

hai nazakat ke sabab chehra-e-gulzar safed

ghar mere shab ko jo wo rashk-e-qamar aa nikla

ho gae partaw-e-ruKH se dar o diwar safed

lab o dandan ke tasawwur mein jo roya main kabhi

ashk do-chaar bahe surKH to do-chaar safed

hui sarsabz jo sohbat mein 'amanat' ki ghazal

rang dushman ka hua rashk se ek bar safed