giran tha matn mushkil aur bhi tabir paDh lena

girāñ thā matn mushkil aur bhī ta.abīr paḌh lenā

to āsāñ kar liyā dil-ḳhvāh ik tafsīr paḌh lenā

guzishta shab ishāroñ se likhā kuchh chāñd par maiñ ne

tumheñ ma.alūm hogā phir bhī vo tahrīr paḌh lenā

mahārat ho ga.ī chehroñ ko paḌh paḌh kar hameñ itnī

ki ab āsāñ hai chehre kī jagah tasvīr paḌh lenā

mulā.em uñgliyoñ kī har ibārat yaad hai mujh ko

har ik añgushtarī ko halqa-e-zanjīr paḌh lenā

milī thī ik yahī shorish-zada dil kī amal-dārī

so likh dī hai tumhāre naam ye jāgīr paḌh lenā

agar tārīḳh kuchh alfāz likkhe aglī sadiyoñ meñ

to kyā kyā log ab haiñ qābil-e-tahrīr paḌh lenā

mohabbat ḳhuun ban kar jism meñ dauḌe to kyā kahnā

bas itnā kah diyā baaqī kalām-e-'mīr' paḌh lenā

giran tha matn mushkil aur bhi tabir paDh lena

to aasan kar liya dil-KHwah ek tafsir paDh lena

guzishta shab ishaaron se likha kuchh chand par main ne

tumhein malum hoga phir bhi wo tahrir paDh lena

mahaarat ho gai chehron ko paDh paDh kar hamein itni

ki ab aasan hai chehre ki jagah taswir paDh lena

mulaem ungliyon ki har ibarat yaad hai mujh ko

har ek angushtari ko halqa-e-zanjir paDh lena

mili thi ek yahi shorish-zada dil ki amal-dari

so likh di hai tumhaare nam ye jagir paDh lena

agar tariKH kuchh alfaz likkhe agli sadiyon mein

to kya kya log ab hain qabil-e-tahrir paDh lena

mohabbat KHun ban kar jism mein dauDe to kya kahna

bas itna kah diya baqi kalam-e-'mir' paDh lena