giri wo charKH se bijli jala wo aashiyan apna

girī vo charḳh se bijlī jalā vo āshiyāñ apnā

miTā vo dekhte hī dekhte nām-o-nishāñ apnā

maiñ sajda is kashākash meñ kabhī kar hī nahīñ saktā

idhar dair-o-haram apne udhar vo āstāñ apnā

ḳhudā sharmā.e aise irtibāt-e-ahl-e-duniyā ko

ki jo hai rāz-dāñ un kā vahī hai rāz-dāñ apnā

koī kyoñ tuur par ḳhanda-zan-e-zauq-e-nazar hotā

kalīm apnī jagah karnā thā pahle imtihāñ apnā

mujhe kyā vo ġham-e-duniyā ho yā uftād-e-mahshar ho

na koī hai yahāñ apnā na koī hai vahāñ apnā

ye manzar soḳhta-jānoñ ke hai pesh-e-nazar har dam

ki jaise sāmne vo jal rahā hai āshiyāñ apnā

dam-e-ruḳhsat bas itnī aarzū hai ai chaman vaalo

hamāre āshiyāne ko samajhnā āshiyāñ apnā

koī had bhī hai is zauq-e-tan-āsānī kī ai 'afqar'

ajal kā ḳhvāb ab to ho gayā ḳhvāb-e-girāñ apnā

giri wo charKH se bijli jala wo aashiyan apna

miTa wo dekhte hi dekhte nam-o-nishan apna

main sajda is kashakash mein kabhi kar hi nahin sakta

idhar dair-o-haram apne udhar wo aastan apna

KHuda sharmae aise irtibaat-e-ahl-e-duniya ko

ki jo hai raaz-dan un ka wahi hai raaz-dan apna

koi kyon tur par KHanda-zan-e-zauq-e-nazar hota

kalim apni jagah karna tha pahle imtihan apna

mujhe kya wo gham-e-duniya ho ya uftad-e-mahshar ho

na koi hai yahan apna na koi hai wahan apna

ye manzar soKHta-jaanon ke hai pesh-e-nazar har dam

ki jaise samne wo jal raha hai aashiyan apna

dam-e-ruKHsat bas itni aarzu hai ai chaman walo

hamare aashiyane ko samajhna aashiyan apna

koi had bhi hai is zauq-e-tan-asani ki ai 'afqar'

ajal ka KHwab ab to ho gaya KHwab-e-giran apna