girya dil ko na su-e-chashm bahao

girya dil ko na sū-e-chashm bahāo

Dūbtī hai bhañvar meñ jā kar naav

na galī apnī vaañ kabhī khichḌī

nit pakāte rahe ḳhayālī polāv

dil hai ai naala juuñ kabāb-e-varaq

aañch kam de ye khā na jaa.e taav

bosa lete meñ kaaT khāte ho

kyā tumhārā burā paḌā hai subhāv

jī pe yaañ ban rahī hai ye to kaho

aaj kīdhar chale ho kar ke banāv

kyuuñ ke rakhkhūñ qadam galī meñ tirī

vaañ to paḌtā nahīñ hai apnā havāv

ātish-e-me.ada ko nahīñ serī

juuñ jahannam kare hai laav hī laav

dil jo maiñ gum kiyā to tum ko kyā

yaaro is baat kā karo na chuvāv

thī shab-e-vasl par ḳhayāl ke saath

ham ne dil se nikāle kyā kyā chaao

dah-e-dil hai ta.alluqe meñ tire

ḳhvāh uujaḌ kar is ko ḳhvāh basāo

marham-e-lutf muñh na moḌiyo to

abhī aale haiñ sab jigar ke ghaao

ye zamīñ bhī hai turfa ma.anī-ḳhez

'mus.hafī' ik ġhazal to aur sunāo

girya dil ko na su-e-chashm bahao

Dubti hai bhanwar mein ja kar naw

na gali apni wan kabhi khichDi

nit pakate rahe KHayali polaw

dil hai ai nala jun kabab-e-waraq

aanch kam de ye kha na jae taw

bosa lete mein kaT khate ho

kya tumhaara bura paDa hai subhaw

ji pe yan ban rahi hai ye to kaho

aaj kidhar chale ho kar ke banaw

kyun ke rakhkhun qadam gali mein teri

wan to paDta nahin hai apna hawaw

aatish-e-meada ko nahin seri

jun jahannam kare hai law hi law

dil jo main gum kiya to tum ko kya

yaro is baat ka karo na chuwaw

thi shab-e-wasl par KHayal ke sath

hum ne dil se nikale kya kya chao

dah-e-dil hai talluqe mein tere

KHwah ujaD kar is ko KHwah basao

marham-e-lutf munh na moDiyo to

abhi aale hain sab jigar ke ghao

ye zamin bhi hai turfa mani-KHez

'mushafi' ek ghazal to aur sunao