girya-e-shabnam gulon ki chaak-damani ki baat

girya-e-shabnam guloñ kī chāk-dāmānī kī baat

kis ne samjhā nik.hat-e-gul kī pareshānī kī baat

jab se badlā hai zamāne kā nizām-e-eqtidār

rāhzan karte haiñ manzil kī nigahbānī kī baat

shikva-e-jaur-o-jafā be-sūd hai un ke huzūr

zikr-e-iḳhlās-o-vafā se jahl-o-nādānī kī baat

āstīnoñ meñ liye phirte haiñ ho ḳhanjar mudām

vo bhī karte haiñ falāh-e-nau-e-insānī kī baat

aql se nā-āshnā ilm-o-hunar se be-ḳhabar

maiñ nahīñ kartā kisī se bhī hama-dānī kī baat

bā.is-e-taskīn hai 'vāris' har ghaḌī mere liye

mid.hat-e-ḳhair-ul-bashar mahbūb-e-rabbānī kī baat

girya-e-shabnam gulon ki chaak-damani ki baat

kis ne samjha nikhat-e-gul ki pareshani ki baat

jab se badla hai zamane ka nizam-e-eqtidar

rahzan karte hain manzil ki nigahbani ki baat

shikwa-e-jaur-o-jafa be-sud hai un ke huzur

zikr-e-iKHlas-o-wafa se jahl-o-nadani ki baat

aastinon mein liye phirte hain ho KHanjar mudam

wo bhi karte hain falah-e-nau-e-insani ki baat

aql se na-ashna ilm-o-hunar se be-KHabar

main nahin karta kisi se bhi hama-dani ki baat

bais-e-taskin hai 'waris' har ghaDi mere liye

midhat-e-KHair-ul-bashar mahbub-e-rabbani ki baat