KHwab-e-gul-rang ke anjam pe rona aaya

ḳhvāb-e-gul-rañg ke anjām pe ronā aayā

āmad-e-sub.h-e-shab-andām pe ronā aayā

dil kā mafhūm ishāroñ se ujāgar na huā

be-kasī-e-gila-e-ḳhām pe ronā aayā

kabhī ulfat sī jhalaktī hai kabhī nafrat sī

ai ta.alluq tire ib.hām pe ronā aayā

mirī ḳhushiyāñ kabhī jis naam se vābasta thiiñ

jaane kyuuñ aaj usī naam pe ronā aayā

le ke ubhregī sahar phir vahī pazhmurda kiran

kyā kahūñ tīrgi-e-shām pe ronā aayā

be-sabab apnī nigāhoñ se girā jaatā huuñ

is fusūñ-kārī-e-ilzām pe ronā aayā

itne arzāñ to nahīñ the mire ashkoñ ke guhar

aaj kyuuñ talḳhī-e-ālām pe ronā aayā

lāyaq-e-husn-e-nazar the na kabhī un ke ḳhutūt

aaj mahrūmī-e-paiġhām pe ronā aayā

ab bhī manzil mire qadmoñ kī tamannā.ī hai

kyā kahūñ hasrat-e-yak-gām pe ronā aayā

rone vaalā to karegā na kisī kā shikva

laakh kahiye ġham-e-ayyām pe ronā aayā

un ke shub.hāt meñ kuchh aur izāfa thā 'shakeb'

ashk-e-sāda ke is in.aam pe ronā aayā

KHwab-e-gul-rang ke anjam pe rona aaya

aamad-e-subh-e-shab-andam pe rona aaya

dil ka mafhum ishaaron se ujagar na hua

be-kasi-e-gila-e-KHam pe rona aaya

kabhi ulfat si jhalakti hai kabhi nafrat si

ai talluq tere ibham pe rona aaya

meri KHushiyan kabhi jis nam se wabasta thin

jaane kyun aaj usi nam pe rona aaya

le ke ubhregi sahar phir wahi pazhmurda kiran

kya kahun tirgi-e-sham pe rona aaya

be-sabab apni nigahon se gira jata hun

is fusun-kari-e-ilzam pe rona aaya

itne arzan to nahin the mere ashkon ke guhar

aaj kyun talKHi-e-alam pe rona aaya

layaq-e-husn-e-nazar the na kabhi un ke KHutut

aaj mahrumi-e-paigham pe rona aaya

ab bhi manzil mere qadmon ki tamannai hai

kya kahun hasrat-e-yak-gam pe rona aaya

rone wala to karega na kisi ka shikwa

lakh kahiye gham-e-ayyam pe rona aaya

un ke shubhat mein kuchh aur izafa tha 'shakeb'

ashk-e-sada ke is inam pe rona aaya