go hun wahshi pa tere dar se na Tal jaunga

go huuñ vahshī pa tire dar se na Tal jā.ūñgā

haañ magar dasht-e-adam hī ko nikal jā.ūñgā

tā.ir-e-nāma-bar apnā yahī kahtā hai ki aah

raqam-e-shauq kī garmī se maiñ jal jā.ūñgā

jald ai kaash jatāve use joban us kā

phir ho kis kaam ke tum jab ki maiñ Dhal jā.ūñgā

aaj go us ne ba-rusvā.ī nikālā mujh ko

gar yahī dil hai to phir aap se kal jā.ūñgā

mashvara kar ke ye dil kūcha-e-jānāñ ko chalā

azm to laane kā kiijo maiñ machal jā.ūñgā

gar yahī ātish-e-ulfat hai to mānind-e-sipand

aah meñ mujmir hastī se uchhal jā.ūñgā

nau-giraftār-e-mohabbat huuñ mirī vaz.a se tum

itnā ghabrāo na pyāre maiñ sambhal jā.ūñgā

vaa.e qismat kahe jab sabr sā mūnis ye baat

tujh pe dekhūñgā burā vaqt to Tal jā.ūñgā

jald ḳhū apnī badal varna koī kar ke tilism

aa ke dil apnā tire dil se badal jā.ūñgā

jī kahīñ tū na phañsā varna tire daam se maiñ

āb-e-ġhirbāl kī mānind nikal jā.ūñgā

juuñ hinā apne vo qadmoñ se na lagne deñge

is tamannā meñ agar ḳhaak meñ ral jā.ūñgā

jaate jaate kaf-e-afsos isī hasrat meñ

ashk bhar lā ke dam-e-naz.a bhī mal jā.ūñgā

jin ke nazdīk hai andāz-e-ġhazal 'mīr' pe ḳhatm

un ko 'jur.at' maiñ sunāne ye ġhazal jā.ūñgā

go hun wahshi pa tere dar se na Tal jaunga

han magar dasht-e-adam hi ko nikal jaunga

tair-e-nama-bar apna yahi kahta hai ki aah

raqam-e-shauq ki garmi se main jal jaunga

jald ai kash jatawe use joban us ka

phir ho kis kaam ke tum jab ki main Dhal jaunga

aaj go us ne ba-ruswai nikala mujh ko

gar yahi dil hai to phir aap se kal jaunga

mashwara kar ke ye dil kucha-e-jaanan ko chala

azm to lane ka kijo main machal jaunga

gar yahi aatish-e-ulfat hai to manind-e-sipand

aah mein mujmir hasti se uchhal jaunga

nau-giraftar-e-mohabbat hun meri waza se tum

itna ghabrao na pyare main sambhal jaunga

wae qismat kahe jab sabr sa munis ye baat

tujh pe dekhunga bura waqt to Tal jaunga

jald KHu apni badal warna koi kar ke tilism

aa ke dil apna tere dil se badal jaunga

ji kahin tu na phansa warna tere dam se main

aab-e-ghirbaal ki manind nikal jaunga

jun hina apne wo qadmon se na lagne denge

is tamanna mein agar KHak mein ral jaunga

jate jate kaf-e-afsos isi hasrat mein

ashk bhar la ke dam-e-naza bhi mal jaunga

jin ke nazdik hai andaz-e-ghazal 'mir' pe KHatm

un ko 'jurat' main sunane ye ghazal jaunga