go ki mohtaj hain gada hain hum

go ki mohtāj haiñ gadā haiñ ham

be-niyāzī ke bādshā haiñ ham

chashm-e-tahqīr se hameñ mat dekh

ḳhaak to haiñ pe tūtiyā haiñ ham

aah is umr-e-be-baqā kī tarah

rahrav-e-kishvar-e-fanā haiñ ham

aisā be-barg o be-navāhī kaun

jaise be-barg o be-navā haiñ ham

go hameñ tū kabhī na yaad kare

par tirī yaad meñ sadā haiñ ham

mubtalā us balā meñ koī na ho

jis balā meñ ki mubtalā haiñ ham

maar kar bhī hamīñ pe pachhtāyā

be-vafā tū ki be-vafā haiñ ham

jab.ha-sā.ī se dushmanī hai jise

usī ke dar pe jab.ha-sā haiñ ham

kaun rahbar ho ishq kī rah meñ

aap hī apne rahnumā haiñ ham

haiñ to sūrat-parast ā.īna-dār

nek ma.anī se āshnā haiñ ham

aur dīvāna kaun hai 'joshish'

yā divānā thā qais yā haiñ ham

go ki mohtaj hain gada hain hum

be-niyazi ke baadsha hain hum

chashm-e-tahqir se hamein mat dekh

KHak to hain pe tutiya hain hum

aah is umr-e-be-baqa ki tarah

rahraw-e-kishwar-e-fana hain hum

aisa be-barg o be-nawahi kaun

jaise be-barg o be-nawa hain hum

go hamein tu kabhi na yaad kare

par teri yaad mein sada hain hum

mubtala us bala mein koi na ho

jis bala mein ki mubtala hain hum

mar kar bhi hamin pe pachhtaya

be-wafa tu ki be-wafa hain hum

jabha-sai se dushmani hai jise

usi ke dar pe jabha-sa hain hum

kaun rahbar ho ishq ki rah mein

aap hi apne rahnuma hain hum

hain to surat-parast aaina-dar

nek mani se aashna hain hum

aur diwana kaun hai 'joshish'

ya diwana tha qais ya hain hum